लोहारा तालुक्यातील धानुरी येथील विद्यामाता इंग्लिश स्कूल येथे गुरुवारी (दि.२९) आषाढी एकादशी निमित्त दिंडीचे आयोजन करण्यात आले होते. यात विद्यार्थ्यांनी मोठ्या उत्साहाने सहभाग नोंदवला होता.
शाळेच्या मैदानावरती भव्य असे रिंगण आखण्यात आले होते. विठ्ठल व रुक्मिणी मातेचे रूप विद्यार्थ्यांनी साकारले होते. प्रत्यक्षात विठ्ठलाचे व रुक्मिणी मातेची मूर्ती डोळ्यामध्ये सामावली. संपूर्ण शाळेचा परिसर विठ्ठल नामाच्या गजराने दुमदुमून निघाला.
दिंडीमध्ये पालखी व बाल वारकरी सोबत रिंगण प्रदक्षिणा घालण्यात आली. सर्वच विद्यार्थीनी वारकऱ्यांच्या वेशभूषेमध्ये दिंडीमध्ये सहभाग नोंदविला होता. मोठ्या उत्साहाने सर्व विद्यार्थ्यांनी हातामध्ये झेंडे, टाळ मुलींच्या डोक्यावरती वृंदावन अशाप्रकारे विद्यार्थ्यांनी विविध वेशभूषाने सर्वांना आकर्षित केले.
सर्व विद्यार्थ्यांनी आणि शिक्षकांनी या दिंडीचा मनसोक्त आनंद घेतला. साक्षात पंढरीचे रूप शाळेने धारण केले होते. मुलांनी व शिक्षकांनी पाऊल खेळणे, फुगडी व नृत्य अशा अनेक विविध कला सादर केल्या. संपूर्ण परिसरामध्ये एकच नाद गुंजत होता बोला पुंडलिक वरदे हरी विठ्ठल श्री ज्ञानदेव तुकाराम पंढरीनाथ महाराज की जय. या दिंडीच्या आयोजन शाळेच्या मुख्याध्यापिका हिरा सोलापूरे यांच्या मार्गदर्शनाखाली करण्यात आले होते. सर्व शिक्षक व शिक्षकेतर कर्मचारी यांच्या सहकार्याने कार्यक्रम मोठ्या उत्साहात पार पडला.
