वार्तादूत – डिजिटल न्युज नेटवर्क
लोहारा तालुक्यातील १३ ग्रामपंचायतीच्या निवडणुका होत आहेत. नामनिर्देशन पत्र दाखल करण्याच्या चौथ्या दिवशी गुरुवार (दि. १) अखेर एकूण ८५ नामनिर्देशन पत्र दाखल झाले आहेत.
तालुक्यातील १३ ग्रामपंचायतीच्या निवडणुकीची रणधुमाळी सुरू झाली आहे. या निवडणुकीसाठी दि. २८ नोव्हेंबर ते २ डिसेंबर या कालावधीत नामनिर्देशन पत्र भरण्याची मुदत आहे. नामनिर्देशन पत्र दाखल करण्याच्या पहिल्या दिवशी सोमवारी (दि. २८) एकूण ७ जणांचे नामनिर्देशन पत्र दाखल झाले होते. त्यानंतर मंगळवारी ११ तर बुधवारी १८ नामनिर्देशन पत्र दाखल झाले होते. गुरुवारी (दि. १) ४९ नामनिर्देशन पत्र दाखल करण्यात आले आहेत. नामनिर्देशन पत्र ऑनलाईन भरताना वेबसाईट सुरळीत चालत नसल्याने विलंब होत होता. त्यामुळे इच्छुकांनी रात्रभर जागून ऑनलाईन भरण्याचा प्रयत्न केला. परंतु सर्वच ठिकाणी ही अडचण असल्याने निवडणूक आयोगाने नामनिर्देशन पत्र ऑफलाईन स्वीकारण्यात यावे अशा सूचना गुरुवारी (दि.१) सकाळी दिल्या. त्यामुळे ऑफलाईन नामनिर्देशन पत्र दाखल करून घेण्यास सुरुवात झाली. ऑफलाईनसाठी परवानगी मिळाल्याने इच्छुकांना मोठा दिलासा मिळाला.
आत्तापर्यंत एकूण ८५ नामनिर्देशन पत्र दाखल झाले आहेत. त्यापैकी १० सरपंच पदासाठी तर ७५ सदस्य पदासाठी आहेत. या निवडणुकीसाठी २ डिसेंबर च्या सायंकाळी ५.३० पर्यंत नामनिर्देशन पत्र दाखल करता येणार आहेत. या १३ ग्रामपंचायतसाठी दि. १८ डिसेंबरला मतदान तर २० डिसेंबरला मतमोजणी होणार आहे.
