वार्तादूत – डिजिटल न्युज नेटवर्क
लोहारा तालुक्यातील धानुरी येथे रविवारी (दि.२८) मंदिरात गणेश मूर्तीची प्राणप्रतिष्ठापना करण्यात आली. यावेळी विविध धार्मिक कार्यक्रमाचे आयोजन करण्यात आले होते.
लोहारा तालुक्यातील धानुरी येथे किशोर साळुंके, ऍड. दीपक जवळगे यांनी स्वखर्चातून गणेश मंदिर उभारले आहे. या मंदिरात गणेश मूर्तीची प्राणप्रतिष्ठापणा करण्यात आली. यावेळी महेश महाराज यांच्या हस्ते श्रीची पूजा करून मूर्तीची स्थापना करण्यात आली.
प्रारंभी गणेश मूर्तीची गावातून सवाद्य भव्य मिरवणूक काढण्यात आली होती. यावेळी शिवगर्जना ढोल पथकाने आपली कला सादर केली. यात विठ्ठल सांप्रदायिक भजनी मंडळ, जय हनुमान सांप्रदायिक मंडळ, नरेंद्र माऊली सेवा मंडळ, महिला भजनी मंडळ, अहिल्याबाई होळकर ढोल पथक मिरवणुकीत सहभागी झाले होते. ढोल ताशाचा गजर, गणपती बप्पा मोरयाच्या जय घोषाणे धानुरी नगरी दुमदुमली होती. यावेळी माजी जि. प. उपाध्यक्ष अशोकराव जवळगे, किशोर साळुंके, दीपक जवळगे, जिल्हा परिषद सदस्या आश्विनीताई जवळगे यांच्यासह समस्त गावकरी उपस्थित होते.
