वार्तादूत – डिजिटल न्युज नेटवर्क
लोहारा नगरपंचायतीच्या १३ जागांच्या निवडणुकीसाठी मंगळवारी (दि.२१) सकाळी साडेसात ते साडेपाच या वेळेत मतदान पार पडले. एकूण ५४६० पैकी ४४११ मतदारांनी मतदानाचा हक्क बजावला. या निवडणुकीसाठी ८०.७८ टक्के मतदान झाले. किरकोळ शाब्दिक वाद वगळता मतदान शांततेत पार पडले.
लोहारा नगरपंचायतीच्या एकूण १७ जागांसाठी निवडणूक कार्यक्रम जाहीर झाला होता. परंतु सर्वोच्च न्यायालयाने ओबीसी आरक्षणास स्थगिती दिल्याने राज्य निवडणूक आयोगाने ओबीसी प्रवर्गाच्या प्रभागाची निवडणूक स्थगित केली होती. त्यामुळे लोहारा नगरपंचायत निवडणुकीसाठी ओबीसी प्रवर्गासाठी आरक्षित झालेल्या चार प्रभागाची वगळता उर्वरित १३ प्रभागातील निवडणूक प्रक्रिया पार पडली. या निवडणुकीसाठी शिवसेना व राष्ट्रवादी काँग्रेसने आघाडी केली होती. तर काँग्रेस(आय) ने स्वबळावर निवडणूक लढवली. या १३ जागेसाठी राजकीय पक्षांसह अपक्ष उमेदवार असे एकूण ५४ जण निवडणूक रिंगणात होते. अखेर उमेदवारी अर्ज माघारी घेण्याच्या शेवटच्या दिवशी यापैकी १० जणांनी उमेदवारी अर्ज मागे घेतल्याने १३ जागांसाठी ४४ जण नशीब आजमावत होते. त्यापैकी प्रभाग क्रमांक २ व प्रभाग क्रमांक ११ मधील अपक्ष उमेदवारांनी राष्ट्रवादी काँग्रेस – शिवसेना आघाडीच्या उमेदवारांना जाहीर पाठिंबा दिला. त्यामुळे १३ जागेसाठी एकूण ४२ जण नशीब आजमावत होते. अखेर सर्व उमेदवारांचे भवितव्य मतदानयंत्रात बंद झाले आहे. या निवडणुकीसाठी निवडणूक विभागाने एक आचारसंहीता पथक, तीन क्षेत्रिय अधिकारी, १३ मतदान केंद्राध्यक्ष, ३९ मतदान केंद्र अधिकारी, १३ सेवक नेमण्यात आले होते. १३ मतदान केंद्र निर्माण केले होते. मतदान प्रकिया व्यवस्थित पूर्ण करण्यासाठी निवडणूक निरीक्षक म्हणून अप्पर जिल्हाधिकारी रुपाली आवले, निवडणूक निर्णय अधिकारी राजकुमार माने, सहाय्यक निवडणूक अधिकारी तथा नगरपंचायतचे प्रभारी मुख्याधिकारी लक्ष्मण राठोड यांच्यासह कर्मचाऱ्यांनी काम पाहिले. मंगळवारी (दि. २१) सकाळी साडेसात ते साडेपाच या वेळेत मतदान पार पडले. एकूण ५४६० पैकी ४४११ मतदारांनी मतदानाचा हक्क बजावला. या निवडणुकीसाठी ८०.७८ टक्के मतदान झाले. काही ठिकाणी झालेला किरकोळ शाब्दिक वाद वगळता मतदान शांततेत पार पडले. मतदान प्रक्रिया व्यवस्थित पार पडण्यासाठी चोख पोलिस बंदोबस्त ठेवण्यात आला होता. मतदान पार पडल्यानंतर सर्व केंद्राध्यक्ष यांनी मतदान केंद्रावर झालेल्या मतदानाचा अहवाल निवडणूक निर्णय अधिकारी राजकुमार माने यांच्याकडे सोपविला.
——————–
मतमोजणी १९ जानेवारीला
लोहारा नगरपंचायतीच्या १३ जागांसाठी मतदान पार पडले. परंतु उर्वरित ४ जागांसाठी निवडणूक प्रक्रिया होणार आहे. या ४ जागांसाठी १८ जानेवारीला मतदान होणार आहे. त्यानंतर १९ जानेवारीला सर्वच १७ जागांसाठीची मतमोजणी होणार आहे.