नवी दिल्ली, २ सप्टेंबर : देशभरातील फोटोग्राफर्सना मदत, मार्गदर्शन आणि विविध माध्यमातून सक्षम करण्यासाठी कार्यरत असलेल्या एआयपीएचएच – ऑल इंडिया फोटोग्राफर्स हेल्पिंग हँड फाउंडेशनचा दिल्ली येथे आयोजित फोटोग्राफर्स सक्सेस डे कार्यक्रमात विशेष सर्टिफिकेट ऑफ अॅप्रिसिएशन देऊन सन्मान करण्यात आला.
दिल्लीतील लेमन ट्री हॉटेल येथे झालेल्या या कार्यक्रमास फोटोग्राफी क्षेत्रातील व्यावसायिक आणि फोटोग्राफर्स उपस्थित होते. कार्यक्रमाचे आयोजक तसेच इंडियाज फोटोग्राफर्स क्लबशी संबंधित अब्दुल्ला अन्सारी यांच्या संस्थेच्या वतीने एआयपीएचएचच्या संपूर्ण टीमला हा सन्मान प्रदान करण्यात आला.फोटोग्राफर्सना अडचणीच्या काळात आर्थिक मदत आणि आवश्यक सहकार्य देण्याबरोबरच शिक्षण, ज्ञान, माहिती व व्यावसायिक मार्गदर्शनाच्या माध्यमातून सक्षम करण्याचे कार्य एआयपीएचएचकडून सुरू आहे. फोटोग्राफी क्षेत्रातील एखाद्या फोटोग्राफरवर आलेली अडचण ही केवळ त्याची वैयक्तिक समस्या न मानता संपूर्ण फोटोग्राफी समुदायाने त्याच्या पाठीशी उभे राहावे, ही संस्थेची भूमिका आहे.
देशातील विविध राज्यांतील फोटोग्राफर्सना एका व्यासपीठावर आणून परस्पर सहकार्याची भावना निर्माण करण्यासाठीही संस्थेचे प्रयत्न सुरू आहेत. ‘सबका साथ, सबका विकास’ या विचारातून एआयपीएचएचची राष्ट्रीय स्तरावर वाटचाल सुरू आहे. या कार्यक्रमात एआयपीएचएचच्या २१ सदस्यांची उपस्थिती होती.
मिळालेला सन्मान हा संस्थेच्या संपूर्ण टीमकडून सुरू असलेल्या कार्याची पावती असल्याची भावना यावेळी व्यक्त करण्यात आली. आगामी काळात अधिकाधिक फोटोग्राफर्सपर्यंत पोहोचून त्यांना शैक्षणिक, आर्थिक व कायदेशीर सहकार्य देण्याचा संस्थेचा मानस आहे. फोटोग्राफी समुदायाला एकजूट, सक्षम आणि सन्मानित करण्याच्या दिशेने सुरू असलेल्या एआयपीएचएचच्या कार्याला दिल्लीतील हा सन्मान नवी प्रेरणा देणारा ठरला आहे.
