लोहारा Lohara) पंचायत समितीच्या गटशिक्षणाधिकारी कार्यालयाकडून तालुकास्तरीय शिक्षक पुरस्कारासाठी प्राप्त प्रस्तावांपैकी निवड करून शिक्षकांचा सन्मान करण्यात येतो. परंतु मागील तीन वर्षांपासून हे पुरस्कार देण्यात आले नव्हते. अखेर आज मागील तीन वर्षांतील तालुकास्तरीय शिक्षक पुरस्कारासाठी निवड झालेल्या शिक्षकांना सन्मानित करण्यात येणार आहे.
शिक्षकांना प्रोत्साहन मिळावे यासाठी तालुकास्तरीय शिक्षक पुरस्कार (Teacher Award) देण्यात येतो. लोहारा तालुक्यात सहा केंद्र आहेत. प्रत्येक केंद्रातून दोन याप्रमाणे दरवर्षी एकूण १२ शिक्षकांची प्राप्त प्रस्तावातून निवड करण्यात येते. परंतु मागील तीन वर्षांपासून हे पुरस्कार वितरित करण्यात आले नव्हते. त्यामुळे शिक्षकांमधून नाराजी व्यक्त केली जात होती. अखेर याला मुहूर्त मिळाला असून लोहारा शहरात शनिवारी (दि.२८) या कार्यक्रमाचे आयोजन करण्यात आले आहे. या कार्यक्रमात २०२१-२२, २०२२-२३, २०२३-२४ या तीन वर्षांतील एकूण २५ पुरस्कार मान्यवरांच्या हस्ते प्रदान करण्यात येणार असल्याची माहिती प्रभारी गटशिक्षणाधिकारी सुभाष चव्हाण यांनी दिली. याच कार्यक्रमात राज्यस्तरीय आदर्श शिक्षक पुरस्कार प्राप्त तालुक्यातील दोन शिक्षकांचाही सन्मान करण्यात येणार आहे.
