लोहारा शहरात महाशिवरात्री निमित्त दरवर्षी यात्रा महोत्सव आयोजित करण्यात येतो. यावर्षीचे हे २६ वे वर्ष आहे. यात्रा महोत्सवात पाच दिवस विविध कार्यक्रमांचे आयोजन करण्यात आले आहे. दि. १५ ते १९ फेब्रुवारी या कालावधीत हा यात्रा महोत्सव होणार आहे. या यात्रा महोत्सवाची जय्यत तयारी सुरू आहे.
महाशिवरात्री निमित्त दरवर्षी लोहारा शहरात यात्रा महोत्सव आयोजित करण्यात येतो. यावर्षी २६ वे वर्ष आहे. या रौप्य महोत्सवी यात्रा महोत्सवाची जय्यत तयारी करण्यात येत आहे. महाशिवरात्रीच्या दिवशी रविवारी (दि. १५ फेब्रुवारी) या महोत्सवाची सुरुवात होणार आहे. या दिवशी शोभायात्रा होणार आहे. या शोभयात्रेचे सकाळी ११ वाजता छत्रपती शिवाजी महाराज चौकात आगमन होताच महादेवाची आरती होईल. त्यानंतर ही शोभायात्रा जुन्या गावातील प्राचीन महादेव मंदिरापर्यंत काढण्यात येणार आहे. दुपारी १२ वाजता भारुडाचा कार्यक्रम होणार आहे. या दिवशी सायंकाळी सहा वाजता दिपोत्सव (महिलांसाठी ) होणार आहे. याच दिवशी राज्यस्तरीय बुद्धिबळ स्पर्धा होणार आहे. दुसऱ्या दिवशी सोमवारी (दि.१६)) सकाळी साडे अकरा वाजता भुजंग महाराज पळसकर यांचे काल्याचे किर्तन होणार आहे. त्यानंतर महाप्रसादाचा कार्यक्रम होईल. दुपारी ४ वाजता भव्य खुल्या जंगी कुस्त्यांचा फड रंगणार आहे.
शेवटची कुस्ती विजेत्या मल्लास चांदीची महादेवाची पिंड शिवशंकर जट्टे कुटुंबियांच्या वतीने देण्यात येणार आहे. उपविजेत्यास लोहारा खुर्द येथील संजय रसाळ यांच्या वतीने रु. ५०००/- व स्मृतिचिन्ह देण्यात येणार आहे.
तिसऱ्या दिवशी मंगळवारी (दि. १७) सकाळी ७ वाजता मॅरेथॉन स्पर्धा होणार आहे. सायंकाळी चार वाजता भारतमाता मंदिराच्या पाठीमागील हायस्कुल लोहारा शाळेच्या मैदानावर सुप्रसिद्ध कीर्तनकार इंदुरीकर महाराज यांच्या कीर्तनाचा कार्यक्रम होणार आहे. चौथ्या दिवशी बुधवारी (दि.१८) सकाळी १० वाजता श्री बसवेश्वर मंदिर येथे महिलांसाठी खुल्या रांगोळी स्पर्धा व व्यंगचित्र, छायाचित्र प्रदर्शन होणार आहे. रात्री सात वाजता भव्य जंगी जुगलबंदी हा भारुडाचा कार्यक्रम होणार आहे. पाचव्या दिवशी गुरुवारी (दि.१९) सायंकाळी सात वाजता हायस्कुल लोहारा शाळेच्या मैदानावर भव्य खुल्या राज्यस्तरीय नृत्य स्पर्धा होणार आहे. या सर्व कार्यक्रम व स्पर्धांचा परिसरातील भाविक भक्तांनी लाभ घ्यावा असे आवाहन यात्रा कमिटी व ग्रामस्थांच्या वतीने करण्यात आले आहे.
