लोहारा येथील मॅरेथॉन स्पर्धेत चाकूर येथील निवृत्ती गुडेवाड प्रथम

लोहारा (lohara) शहरात महाशिवरात्री (mahashivratri) यात्रा महोत्सवानिमित्त रविवारी ( दि. १०) सकाळी आयोजित मॅरेथॉन (marathon) स्पर्धेत चाकूर येथील निवृत्ती गुडेवाड प्रथम तर हिप्परगा (रवा) येथील वग्रसेन जाधव याने व्दितीय क्रमांक पटकावला आहे.
या स्पर्धेचे उदघाटन पोलीस निरीक्षक अजित चिंतले यांच्या हस्ते करण्यात आले. यावेळी राजेंद्र फावडे, डॉ. बाळासाहेब भुजबळ, बालाजी माशाळकर, हरी लोखंडे आदींची प्रमुख उपस्थिती होती. छत्रपती शिवाजी महाराज चौक ते भानुदास चव्हाण महाविद्यालय येथून परत छत्रपती शिवाजी महाराज चौकापर्यंत ही स्पर्धा घेण्यात आली. या मॅरेथॉन स्पर्धेसाठी उस्मानाबाद जिल्ह्यासह लातुर परीसरातील एकुण ५५ स्पर्धकांनी सहभाग नोंदविला होता. ही स्पर्धा लहान व मोठ्या गटात घेण्यात आली. या स्पर्धेत मोठ्या गटातून चाकूरचा निवृत्ती गुडेवाड प्रथम, हिप्परगा (रवा) येथील वग्रसेन जाधव याने व्दितीय, कास्ती येथील आदिनाथ बेशकराव याने तृतिय तर धानुरी येथील अमर जाधव याने चतुर्थ क्रमांक पटकावला आहे. तर लहान गटात हर्षवर्धन हरी लोखंडे याने प्रथम, मंथन सुनील देशमाने द्वितीय, तर यश अनिल देशमाने यांनी तृतीय क्रमांक पटकावला.

स्पर्धेतील विजेत्यांना बक्षिस वितरण करण्यात आले. यावेळी डॉ. बाळासाहेब भुजबळ, राजेंद्र फावडे, बालाजी माशाळकर, गोपाळ सुतार, विठ्ठल वचने, श्रीनिवास माळी, अमित बोराळे, विरेश स्वामी, सतीश ढगे, भीमाशंकर डोकडे, सुनील देशमाने, महेश कुंभार, राजपाल वाघमारे, बळी रणशूर, वैभव झिंगाडे आदींसह यात्रा कमिटीचे सदस्य व ग्रामस्थ उपस्थित होते.