कर्नाटक राज्यातील भालकी येथे झालेल्या महात्मा बसवेश्वर महाराजांच्या पुतळा विटंबन प्रकरणाच्या निषेधार्थ लोहारा तालुक्यातील जेवळी येथे शनिवारी (दि.१८) कडकडीत बंद ठेवून निषेध व्यक्त करण्यात आला.
भालकी येथे वीरशैव लिंगायत समाजाचे श्रद्धास्थान असलेल्या महात्मा बसवेश्वर महाराजांच्या पुतळ्याची समाजकंटकाकडून विटंबना करण्यात आली आहे. या प्रकरणाच्या निषेधार्थ महाराष्ट्र- कर्नाटक सीमावर्ती भागातील गावात बंद पाळण्यात येत आहे. तालुक्यातील जेवळी येथील वीरशैव लिंगायत समाजाच्या वतीने शनिवारी (दि.१८) बंद पुकारन्यात आला होता. सकाळी दहाच्या सुमारास वीरशैव लिंगायत बांधव येथील बस स्थानक परिसरात एकत्र येऊन महात्मा बसवेश्वर महाराज यांच्या नावाने घोषणा देत या घटनेच्या तीव्र शब्दात निषेध केला. या प्रकरणात सहभागी असलेल्या समाजकंटकावर कडक कारवाई करावी अशी मागणी करण्यात आली. यानंतर गावातील प्रमुख मार्गावरून मोर्चा काढून बाजारपेठ बंद ठेवण्याचे आवाहन करण्यात आले. याला जेवळीकरांनी उस्फूर्त प्रतिसाद देत येथील बाजारपेठ, विविध संस्था कडकडीत बंद ठेवली. यावेळी योगीराज कारभारी, कल्लाप्पा हावळे, रविशंकर धरणे, ओमकार पाटील, शिवराज चिनगुंडे, बुद्धिवंत साखरे, धनराज बिराजदार, सत्तेश्वर ढोबळे, सुधाकर गुंजोटे, मेघराज कारभारी, विजय देसाई, गणेश कारभारी, वैजिनाथ सोळसे, शंकर हावळे, महेश सारणे, सुशील कोराळे, मुन्ना भैरप्पा, शिवानंद मुरमे, प्रतिक कारभारी अभिजीत माळवदकर, ओमकार निंगशेट्टी, सतेश्वर तोरकडे, मनोज भैरप्पा आदींसह समाजबांधव उपस्थित होते.
