वार्तादूत – डिजिटल न्युज नेटवर्क
लोहारा तालुक्यातील होळी येथील ऊस उत्पादक शेतकऱ्यांनी लोकमंगल कारखाना प्रशासनाकडे ऊस बिलाचे उर्वरित ५०० रुपये देण्यात यावे अशी अनेकवेळा मागणी केली होती. तरीही कारखाना प्रशासनाने दखल न घेतल्याने संतप्त ऊस उत्पादक शेतकऱ्यांनी गावातील पाण्याच्या टाकीवर चढून आत्मदहन करण्याच्या उद्देशाने हातात पेट्रोल बाटल्या घेऊन सुमारे सहा तास आंदोलन केले. कारखाना प्रशासनाने बैठक घेण्याचे लेखी आश्वासन दिल्याने हे आंदोलन तात्पुरते मागे घेण्यात आले.
तालुक्यातील होळी येथील ऊस उत्पादक शेतकऱ्यांनी मागील वर्षी लोकमंगल कारखान्यास ऊस दिला आहे. लोकमंगल कारखान्याने दोन हजार प्रमाणे ऊस दर दिला होता. इतर कारखान्याने पंचेविसशे रुपये दर दिला आहे. त्यामुळे उर्वरीत थकीत ५०० रुपये रुपयांचा हप्ता द्यावा या मागणीसाठी होळी येथील ऊस उत्पादक शेतकऱ्यांनी अनेकवेळा कारखाना प्रशासनास निवेदन देऊन उर्वरीत बिलाची मागणी केली. तसेच यापूर्वी कारखाना स्थळी आंदोलन केले होते. दरम्यान, पाच जानेवारीपर्यंत थकीत बिल देण्यात यावे अन्यथा मंगळवारी १० जानेवारीला सामुदायिक आत्मदहन करण्याचा इशारा दिला होता. त्यानुसार सर्व शेतकऱ्यांनी मंगळवारी सकाळी हातात पेट्रोलच्या बाटल्या घेऊन होळी येथील सार्वजनिक पाण्याच्या टाकीवर चढून आंदोलन सुरू करून निर्णय लवकर घ्या, अन्यथा सामुदायिक आत्मदहन करण्याचा इशारा दिला. कारखाना प्रशासनाचे अधिकारी उशिरा आले. यावेळी पोलीस निरीक्षक अजित चिंतले यांच्यासह पोलीस कर्मचारी आंदोलन स्थळी हजर झाले होते.
यावेळी कारखान्याच्या अधिकाऱ्यांनी बुधवारी (दि.११) पोलिस ठाण्यात बैठक घेऊन प्रश्न मार्गी लावण्याचे लेखी आश्वासन दिले. त्यानंतर तब्बल सहा तासानंतर हे आंदोलन तात्पुरते मागे घेण्यात आले असल्याचे आंदोलन कर्त्यांनी सांगितले. या आंदोलनात केशव सरवदे, व्यंकट माळी, संजय मनाळे, पांडुरंग जाधव, दत्तू भोसले, अमोल गायकवाड, प्रवीण मोरे, संजय जाधव, प्रियेश जाधव, भुजंग मोरे, शिवाजी पवार, अनिल गायकवाड, माधव पाटील, मारुती जाधव, किसन पाटील, अमोल शिंदे, ज्ञानेश्वर गवळी, दत्तू गिरी, मधुकर बिराजदार, व्यंकट जाधव आदी सहभागी झाले होते. आंदोलन तात्पुरते स्थगित झाले असले तरी बुधवारी होणाऱ्या बैठकीत काय निर्णय होणार याकडे आंदोलन कर्त्या शेतकऱ्यांचे लक्ष लागले आहे.
