खासदार सुप्रिया सुळे यांना प्राईम पॉईंट फाउंडेशनचा संसद महारत्न पुरस्कार

वार्तादूत – डिजिटल न्युज नेटवर्क
चेन्नई येथील प्राईम पॉईंट फाऊंडेशन आणि इ- मॅगझिनतर्फे देण्यात येणारा संसद महारत्न पुरस्कार राष्ट्रवादी काँग्रेसच्या खासदार सुप्रिया सुळे यांना शनिवारी (दि. 20) प्रदान करण्यात येणार आहे. मुख्य निवडणूक आयुक्त सुनील अरोरा, केंद्रीय मंत्री अर्जुन राम मेघवाल आणि सर्वोच्च न्यायालयाचे निवृत्त न्यायमूर्ती ए. के. पटनायक यांच्या प्रमुख उपस्थितीत हा पुरस्कार प्रदान करण्यात येणार आहे.
संसद महारत्न पुरस्काराबरोबरच खा. सुप्रिया सुळे यांना विद्यमान सतराव्या लोकसभेतील त्यांची उपस्थिती आणि चर्चेतील सहभागासाठी सलग सहाव्यांदा जाहीर झालेला संसदरत्न पुरस्कारही याच कार्यक्रमात प्रदान करण्यात येणार आहे.

लोकसभेत उत्कृष्ट कामगिरी करणाऱ्या खासदारांना फाऊंडेशनतर्फे हा पुरस्कार देण्यात येतो. माजी राष्ट्रपती डॉ. ए. पी. जे. अब्दुल कलाम यांच्या संकल्पनेतून हा पुरस्कार सुरु करण्यात आल्याचे फाऊंडेशनचे के. श्रीनिवासन यांनी सांगितले आहे. गत सोळाव्या लोकसभेत खा. सुप्रिया सुळे यांनी सभागृहात 96 टक्के उपस्थिती लावत 152 चर्चासत्रांत सहभाग घेतला. त्यांनी एकूण 1186 प्रश्न उपस्थित केले, तर 22 खासगी विधेयके मांडली. यासाठी त्यांना फाऊंडेशनतर्फे दर पाच वर्षांनी देण्यात येणारा संसद महारत्न पुरस्कार जाहीर करण्यात आला आहे. याबरोबरच चालू सतराव्या लोकसभेतही खा. सुप्रिया सुळे यांच्या कामगिरीतील सातत्य कायम असून त्यांनी 89 टक्के उपस्थिती लावत 122 चर्चासत्रात भाग घेतला आहे. सभागृहात एकूण 286 प्रश्न त्यांनी विचारले असून चार खासगी विधेयके मांडली आहेत. या कामगिरीसाठी त्यांना पुन्हा एकदा म्हणजे सहाव्यांदा संसदरत्न पुरस्कार प्रदान करण्यात येणार आहे. याबद्दल उस्मानाबाद जिल्हा राष्ट्रवादी काँग्रेसचे जिल्हाध्यक्ष सुरेशदाजी बिराजदार यांनी खासदार सुप्रिया सुळे यांचे जिल्हावासीयांच्या वतीने अभिनंदन केले आहे.