लोहारा तालुक्यातील आरणी येथील एका तरुणास पॅरालेसिसचा अटॅक आला होता. सदरील तरुणाच्या घरची आर्थिक परिस्थिती अत्यंत नाजूक असल्याने गावातील काही तरुणांनी एकत्र येत केलेल्या आवाहनाला प्रतिसाद देत गावकऱ्यांनी आर्थिक मदत केली आहे.
तालुक्यातील आरणी येथील कल्याण सरवदे या तरुणास चार दिवसांपूर्वी पहाटे पॅरालेसिसचा अटॅक आला होता. त्यामुळे सदरील तरुणास त्याच्या कुटुंबीयांनी सोलापूर येथील खाजगी रुग्णालयात नेले होते. गावातील नागरिकांना ही घटना समजली. त्यानंतर गावातील तरुण किशोर थिटे, राहुल थिटे, उमाकांत दरेकर, योगेश दरेकर आदींनी पुढाकार घेऊन गावातील व्हाट्सएप ग्रुपवर सदरील घटनेची माहिती टाकली व सर्वांना या तरुणाच्या उपचारासाठी आर्थिक मदतीचे आवाहन केले. या तरुणांच्या आवाहनाला गावकऱ्यांनीही सकारात्मक प्रतिसाद देत जवळपास पस्तीस हजार रूपये जमा करून त्या तरुणाची मदत केली. गावकऱ्यांनी केलेली ही आर्थिक मदत त्या कुटुंबास खूप महत्त्वाची ठरली आहे.
