लोहारा तालुक्यातील सालेगाव येथील आशा गटप्रवर्तक राजश्री परमेश्वर साळुंके यांना बुधवारी (दि.३१) सालेगाव ग्रामपंचायत कार्यालयात पुण्यश्लोक अहिल्यादेवी होळकर पुरस्कार देऊन गौरविण्यात आले.
प्राथमिक आरोग्य केंद्र माकणी अंतर्गत काम करणाऱ्या सालेगाव येथील आशा गटप्रवर्तक राजश्री परमेश्वर साळुंके यांना महाराष्ट्र शासन महिला व बालविकास विभाग यांच्याकडून देण्यात येणारा ग्रामपंचायत स्तरीय पुण्यश्लोक अहिल्यादेवी होळकर पुरस्कार देण्यात आला. अहिल्यादेवी होळकर जयंतीदिनी बुधवारी (दि.३१) सालेगाव ग्रामपंचायत कार्यालयात सरपंच भाग्यश्री पाटील यांच्या हस्ते हा पुरस्कार देण्यात आला. यावेळी उपसरपंच हुसेन शेख, ग्रामसेवक एन. बी. भोरे, राष्ट्रवादी काँग्रेसचे तालुकाध्यक्ष सुनील साळुंके, गोपाळ माने, ग्रामपंचायत सदस्य, आशा कार्यकर्ती, कृषी सखी व ग्रामस्थ उपस्थित होते. राजश्री साळुंके यांना ट्रॉफी व प्रमाणपत्र देऊन गौरविण्यात आले.
राजश्री साळुंके यांनी सन २००९ पासुन प्राथमिक आरोग्य केंद्र माकणी येथे ४२ आशा व १८ गावचे आरोग्य विषयी काम करत आहेत. यामध्ये गावतील महिलांची आरोग्याची वेळोवेळी तपासणी करणे, गरोदर मातेची वेळोवेळी काळजी घेणे, आशाताईंना वेळोवेळी मार्गदर्शन करणे, ० ते ५ वर्ष लाभार्थीचे लासिकरण करून घेणे, कोविड – १९ च्या अनुषंगाने गावोगावी गृहभेटी देऊन १०० टक्के लसीकरण करणे, कोविडसारख्या परिस्थितीत लोकांची मनोबळ वाढविण्याचे कामे त्यांनी यशस्वीरित्या पार पाडले आहेत. त्यांच्या या कार्याची दखल घेऊन हा पुरस्कार देण्यात आला आहे.
