लोहारा तालुक्यातील जेवळी येथील ग्रामदैवत महात्मा बसवेश्वरांच्या यात्रेला मंगळवार पासून प्रारंभ – तीन दिवस विविध धार्मिक, सांस्कृतिक कार्यक्रमांचे आयोजन

वार्तादूत – डिजिटल न्युज नेटवर्क
लोहारा तालुक्यातील जेवळी येथील ग्रामदैवत महात्मा बसवेश्वरांच्या यात्रेला मंगळवार (दि.३ ) पासून सुरवात होत आहे. यानिमित्त सालाबादप्रमाणे तीन दिवस मोठ्या प्रमाणात विविध धार्मिक, सांस्कृतीक कार्यक्रमाचे आयोजन करण्यात आले आहे.
समतेचे पुजारी व वीरशैव सामाजाचे श्रद्धास्थान असलेल्या महात्मा बसवेश्वरांचे जेवळी येथे पुरातन मंदिर आहे. अनेक वर्षापासून येथे परंपरेने महात्मा बसवेश्वरांची जयंती ही अक्षयतृतीयापासून तीन दिवस यात्रेच्या स्वरुपात साजरी केली जाते. ही यात्रा यावर्षी मंगळवार (दि.३) ते गुरुवार (दि. ५) या कालावधीत पार पडत आहे. या परिसरात ही यात्रा मोठ्या स्वरुपात साजरी होते. उस्मानाबाद, लातूर, सोलापूरसह गुलबर्गा, विजापूर जिल्ह्यातील भाविक यावेळी मोठ्या प्रमाणात सहभागी होतात. मंगळवारी (दि. ३) बसवेश्वरांच्या जयंतीदिनी पहाटे पाच वाजता बसवेश्वर मंदिरातील शिवलिंगास महाभिषकानी या यात्रेला प्रारंभ होणार आहे. तर आठ वाजता १५१ बैलजोड्याची गावातून सालाबाद प्रमाणे सवाद्य मिरवणुक काढण्यात येणार आहे. यानंतर मंदिरा समोरील मैदानावर जिल्हास्तरीय पशु प्रदर्शन व उत्कृष्ट पशुधनास पशुधनास बक्षिसांचे वाटप होईल. संध्याकाळी चार वाजता महात्मा बसवेश्वरांच्या जीवनावर प्रवचन, तर रात्री दहा वाजता बसवेश्वरांचे अक्षता सोहळा व मंदिर परिसरातील नंदी कट्ट्यांवर अग्नीप्रज्वलन कार्यक्रम होईल.
यात्रेच्या दुसऱ्या दिवशी बुधवारी (दि. ४) सकाळी आठ वाजता नंदीध्वज आणि बसवेश्वरांच्या पालकीसह गावातील मुख्य रस्त्यावरुण सवाद्य मिरवणुक, अकरा वाजता नदिकोलासह अग्नीस्पर्श तर रात्री नऊ वाजता सजविलेल्या नंदी ध्वजासह, विविध वाद्यसह छबिना मिरवणुक निघेल. रात्री अकरा वाजता शोभेची दारुकाम मंदिरा समोरील मैदानावर पार पडणार आहे. तर यात्रेच्या तीसऱ्या दिवशी गुरुवारी (दि.५ ) दुपारी चार वाजता कुस्त्यांची दंगल पार पडनार आहे. या यात्रे निमित्त होणाऱ्या विविध कार्यक्रमाचा सर्वांनी लाभ घ्यावा असे आवाहन यात्रा कमिटीचे अध्यक्ष बसवराज कारभारी व सचिव मल्लिनाथ डिग्गे यांनी केले आहे.