लोहारा नगरपंचायतीच्या उर्वरित चार जागेसाठी आज मतदान – चार प्रभागातील १७३१ मतदार बजावणार मतदानाचा अधिकार

वार्तादूत – डिजिटल न्युज नेटवर्क
लोहारा नगरपंचायतीच्या उर्वरित चार जागेसाठी होत असलेल्या निवडणुकीसाठी आज मंगळवारी (दि. १८) मतदान होणार आहे. या निवडणुकीत शिवसेना – राष्ट्रवादी काँग्रेसने आघाडी केली आहे तर काँग्रेस (आय) स्वबळावर निवडणूक लढवत आहेत. दोन्ही बाजूने आपापल्या उमेदवारांच्या प्रचारार्थ मागील तीन चार दिवस पदयात्रा, कॉर्नर बैठका घेण्यात आल्या आहेत.
नगरपंचायतीच्या उर्वरित चार जागांसाठी जोरदार प्रचारयंत्रणा राबविण्यात आली होती. राजकीय पक्षांच्या नेत्यांनी शहरात येऊन मतदारांच्या गाठीभेटी घेऊन आपापल्या उमेदवारांचा प्रचार केला. त्यामुळे मागील तीन चार दिवस शहरातील राजकीय वातावरण चांगलेच तापले होते. नगरपंचायतच्या प्रभाग क्रमांक ८, १०, १६ व १७ ची निवडणूक होत आहे. यासाठी चार मतदान केंद्राची व्यवस्था करण्यात आली आहे. प्रभाग क्र. ८ मध्ये ३७३ मतदार आहेत. प्रभाग क्र. १० मध्ये ४८५ मतदार आहेत. प्रभाग क्र. १६ मध्ये ३६२ मतदार आहेत. तर प्रभाग क्र. १७ मध्ये ५११ मतदार असे एकूण १७३१ मतदार आज मतदानाचा हक्क बजावणार आहेत. यासाठी निवडणूक विभागाने चार मतदान केंद्राची व्यवस्था केली आहे. सकाळी ७.३० ते ५.३० या वेळेत मतदान होणार असून बुधवारी ( दि. १९) मतमोजणी होऊन निकाल जाहीर करण्यात येणार आहे.