विद्यामाता स्कूलमध्ये वार्षिक स्नेहसंमेलन; विविध प्रकारच्या गीतांवर नृत्य सादर करून विद्यार्थ्यांनी जिंकली उपस्थितांची मने

लोहारा (Lohara) तालुक्यातील धानुरी येथील विद्यामाता इंग्लिश स्कूलचे वार्षिक स्नेहसंमेलन मोठ्या उत्साहात पार पडले. यात विद्यार्थ्यांनी विविध प्रकारच्या गीतांवर नृत्य सादर करून उपस्थितांची मने जिंकली.
या वार्षिक स्नेहसंमेलनाचे उद्घाटन शेतकरी विकास संस्थेचे अध्यक्ष अशोकराव जवळगे यांच्या हस्ते करण्यात आले. कार्यक्रमाच्या अध्यक्षस्थानी प्रियदर्शनी शिक्षण संस्थेचे अध्यक्ष राजकुमार काकडे हे होते. तर संस्थेचे सचिव किशोर साळुंके व शाळेच्या मुख्याध्यापिका हिरा सोलापूरे (हावळे) यांची प्रमुख उपस्थिती होती. मुख्याध्यापिका हिरा सोलापूरे यांनी प्रास्ताविक केले. उपस्थित सर्व मान्यवरांच्या हस्ते शाळेच्या मुख्याध्यापिका हिरा सोलापूरे मॅडम यांचा मेस्टाचा आदर्श मुख्याध्यापिका पुरस्कार मिळाल्याबद्दल गौरव करण्यात आला. या स्नेह संमेलनाची सुरुवात मोरया मोरया या गीताने झाली.

विद्यार्थ्यांच्या कलागुणांना वाव देण्यासाठी त्यांच्यामध्ये असणारे सुप्त गुण यांचे प्रदर्शन म्हणजे वार्षिक स्नेहसंमेलन. यामध्ये विद्यार्थ्यांनी विविध कला सादर केली.
पंजाबी सॉन्ग, साउथ इंडियन, लावणी, राधाकृष्ण प्रसंग, झाशी की राणी व सावित्रीबाई फुले आणि डॉक्टर बाबासाहेब आंबेडकर यांचा संघर्ष सर्वांसमोर गाणे व नाटिका यांच्या माध्यमातून सादर केले. फनी सॉंगने सर्वांचे लक्ष वेधले होते. धनगर गीत, येळकोट येळकोट जय मल्हार, मेड इन इंडिया, गोरे रंग पे ना इतना या गाण्यावरती विद्यार्थ्यांनी बहारदार नृत्य सादर केले. या वार्षिक

स्नेहसंमेलनासाठी पालक व विद्यार्थी मोठ्या संख्येने उपस्थित होते. नर्सरी ते दहावीच्या सर्व विद्यार्थ्यांनी या उपक्रमामध्ये सहभाग घेतला होता. मुलांमध्ये अतिशय आनंदाचे वातावरण होते. सर्वांच्या चेहऱ्यावरती एक प्रकारचे हास्य दिसून आले. मुलांनी त्यांच्यामध्ये असणारी कला सादर केली व सर्व प्रेक्षकांचे मने जिंकली. या कार्यक्रमाचे सूत्रसंचालन ओम सूर्यवंशी यांनी तर संजय कांबळे यांनी आभार मानले. संस्थेच्या वतीने सर्व शिक्षक, शिक्षकेत्तर कर्मचारी व पालक यांचे आभार व्यक्त केले. सर्व शिक्षक व शिक्षकेतर कर्मचारी यांच्या सहकार्याने हे वार्षिक स्नेहसंमेलन मोठ्या उत्साहात पार पाडले.