सध्याच्या भीषण दुष्काळी परिस्थितीमुळे माणसांसह पशुपक्षी आणि मुक्या प्राण्यांनाही पिण्याच्या पाण्यासाठी मोठ्या अडचणींचा सामना करावा लागत आहे. उन्हाच्या तीव्रतेत पाण्याअभावी या मुक्या जीवांचे होणारे हाल लक्षात घेऊन त्यांच्या तहानेची जाणीव ठेवून त्यांना पाणी उपलब्ध करून देणे ही केवळ सामाजिक जबाबदारी नसून माणुसकीचे खरे कर्तव्य आहे. याच सामाजिक बांधिलकीतून लोहारा येथील हाजी शब्बीर अहमद अन्सारी बहुउद्देशीय सामाजिक संस्थेच्या वतीने एक स्तुत्य आणि प्रेरणादायी उपक्रम राबविण्यात आला.
या उपक्रमांतर्गत लोहारा शहरातील पशुपक्षी व मुक्या प्राण्यांसाठी विविध ठिकाणी पिण्याच्या पाण्याची व्यवस्था करण्याच्या उद्देशाने पाच पाण्याचे हौद ठेवण्यात आले आहेत. तसेच शहरातील तब्बल २०० कुटुंबांना पक्ष्यांसाठी पाणी ठेवता यावे, यासाठी मातीच्या २०० पाणी कुंड्यांचे मोफत वाटप करण्यात आले. या उपक्रमाचा शुभारंभ तहसीलदार रणजित कोळेकर यांच्या हस्ते करण्यात आला. यावेळी संस्थेचे अध्यक्ष महेबुब फकीर, संस्थेचे सदस्य महंमद फकीर, इक्बाल कुरेशी, रमेश रेणके, शिवाजी मुगळे, युसुफ कुरेशी, सादिक फकीर, जाकीर कुरेशी, अन्वर कुरेशी, जिंदाशा फकीर, मोहम्मदहुसेन बागवान, ताहेर फकीर, अहमद मुलानी, सरफराज फकीर, हमीद शेख, सद्दाम मुलानी, इरफान सय्यद, असलम सय्यद तसेच तहसील कार्यालयातील कर्मचारी वजीर अत्तार, अभिजित गायकवाड उपस्थित होते.

यावेळी बोलताना तहसीलदार रणजितसिंह कोळेकर म्हणाले की, दुष्काळी परिस्थितीत केवळ माणसांचाच नव्हे, तर पशुपक्षी आणि मुक्या प्राण्यांचाही विचार करणे अत्यंत गरजेचे आहे. अशा कठीण काळात सामाजिक संस्थांनी पुढाकार घेऊन समाजोपयोगी उपक्रम राबविणे कौतुकास्पद आहे. हाजी शब्बीर अहमद अन्सारी बहुद्देशीय सामाजिक संस्थेने स्वखर्चाने आणि लोकसहभागातून राबविलेला हा उपक्रम निश्चितच प्रेरणादायी आहे. दुष्काळाच्या या कठीण काळात पशुपक्ष्यांसाठी पाण्याची सोय करून देणाऱ्या संस्थेच्या या उपक्रमातून सामाजिक संवेदनशीलता दिसून येते.






