दिवाळी या आनंद, उत्साह आणि नव्या संकल्पांच्या सणाचे औचित्य साधून सामाजिक बांधिलकी जपत लोहारा तालुक्यातील जेवळी येथे एक प्रेरणादायी उपक्रम राबविण्यात आला. जेवळी येथील पोलीस भरती परीक्षेची तयारी करणाऱ्या युवकांसाठी मंगळवारी (दि.१०) उपयुक्त पुस्तकांचा संच भेट देण्यात आला.
तालुक्यातील जेवळी येथील अनेक युवक पोलीस दलात भरती होण्याचे स्वप्न उराशी बाळगून मेहनत घेत आहेत. या होतकरू युवकांना अभ्यासासाठी प्रोत्साहन आणि आवश्यक साहित्य उपलब्ध व्हावे, या उदात्त हेतूने डॉ. बाबासाहेब आंबेडकर जयंती समिती, समतानगर, जेवळी (उत्तर) यांच्यामार्फत डॉ. बाबासाहेब आंबेडकर स्टडी सेंटर, जेवळी यांना भेट स्वरूपात पोलीस भरती परीक्षेच्या तयारीसाठी उपयुक्त पुस्तकांचा संच भेट देण्यात आला.
ही भेट केवळ पुस्तकांची नसून युवकांच्या स्वप्नांना बळ देणारी आणि त्यांच्या उज्ज्वल भविष्याला दिशा देणारी ज्ञानरूपी भेट आहे. ग्रामीण भागातील युवकांना योग्य अभ्यास साहित्य, मार्गदर्शन आणि प्रोत्साहन मिळाल्यास ते निश्चितच यशाची शिखरे गाठू शकतात. डॉ. बाबासाहेब आंबेडकर यांच्या शिक्षणविषयक विचारांना अभिप्रेत असलेला ज्ञानाचा प्रसार आणि सामाजिक बांधिलकी या उपक्रमातून अधोरेखित होते. या उपक्रमातून प्रेरणा घेऊन जेवळीतील अनेक युवकांनी पोलीस दलात भरती होऊन आपल्या गावाचे, आई-वडिलांचे आणि परिसराचे नाव उज्ज्वल करावे अशी अपेक्षा व्यक्त करण्यात येत आहे.
यावेळी भरतीपूर्व पोलीस प्रशिक्षण प्रशिक्षक अविनाश दांडेकर, बाळासाहेब कांबळे, मारुती गवळी, प्रवीण माटे, बालाजी कांबळे, बलभीम गायकवाड, विशाल साळुंके, सनी क्षीरसागर, रणवीर भांडारकवठे, प्रतीक सुरवसे, प्रेमनाथ मोरे, मनोज गायकवाड, साई शिंदे आदींसह नागरिक उपस्थित होते.
