मोबाईलचा अचानकपणे स्फोट होऊन एक तरुण किरकोळ जखमी; तरुणाच्या प्रसंगावधानामुळे मोठा अनर्थ टळला

मोबाईलचा अचानकपणे स्फोट होऊन एक तरुण किरकोळ जखमी झाल्याची घटना घडली आहे. या प्रकारामुळे परिसरात एकच खळबळ उडाली आहे. या घटनेत हा तरुण थोडक्यात बचावला.
लोहारा तालुक्यातील जेवळी येथे ही घटना घडली आहे. जेवळी येथील गुरु सिद्धेश्वर विरक्त मठात गुरुपौर्णिमा महोत्सवाच्या नियोजनासाठी गुरुवारी (दि.१६) रात्री बैठक आयोजित करण्यात आली होती. या बैठकीत जेवळी (दक्षिण) येथील सोमनाथ वसंत गुंजोटे (वय २५) हा तरुणही सहभागी झाला होता. या बैठकीदरम्यान सोमनाथ गुंजोटे यांच्या जिन्स पॅन्टच्या खिशातून अचानकपणे धूर निघू लागल्याचे दिसून आले. त्यानंतर काहीच वेळात मोबाईलचा स्फोट झाला.​ आवाज झाला. खिशात अचानक आग लागल्याने सोमनाथने प्रसंगावधान दाखवत जळत असलेला मोबाईल तातडीने खिशातून बाहेर फेकला. स्फोटामुळे सोमनाथच्या कपड्यांनी पेट घेतला होता. त्यामुळे नागरिकांनी तात्काळ त्याच्या कपड्यांची आग विझवली. या घटनेत सोमनाथच्या शर्ट व पॅन्टचा काही भाग जळाला असून त्याच्या हाताचे बोट व मांडीच्या त्वचेला किरकोळ इजा झाल्याचे सांगण्यात आले. त्याला जेवळी येथील दवाखान्यात उपचार देण्यात आले. \’रियलमी\’ कंपनीचा हा मोबाईल खिशात ठेवलेला असतानाच अचानकपणे हा प्रकार घडल्याने परिसरात भीतीचे वातावरण निर्माण झाले आहे.

अंगावर असलेल्या कपड्यांच्या खिशात मोबाईलचा स्फोट होऊन अचानक पेट घेतोच कसा, या विचाराने परिसरातील नागरिकांमध्ये भीतीचे वातावरण झाले आहे. या घटनेत सदरील तरुणाने प्रसंगावधान दाखवल्याने मोठा अनर्थ टळला.