कृषी सहाय्यकांच्या प्रलंबित विविध मागण्यांसाठी लोहारा तालुका कृषी अधिकारी कार्यालयासमोर कृषी सहाय्यक संघटना लोहारा शाखेच्या वतीने बुधवारी (दि.७) धरणे आंदोलन करण्यात आले. यावेळी कृषी सहाय्यकांनी जोरदार घोषणाबाजी केली.
याबाबत कृषी सहाय्यक संघटनेने म्हणले आहे की, कृषी सेवक कालावधी रद्द करून कृषी सेवकांना नियमित कृषी सहाय्यक पदावर नियुक्ती द्यावी, कृषी सहाय्यकांचे पदनाम बदलून सहाय्यक कृषी अधिकारी करावे, कृषी विभागातील कामकाज पूर्णपणे डिजिटल झाले असूनही कृषी सहाय्यकांना लॅपटॉप दिला जात नाही तो देण्यात यावा, ग्रामस्तरावर काम करण्यासाठी कृषी मदतनीस मिळावा, निविष्ठा वाटपातील अडचणी दूर कराव्यात आणि वाहतूक खर्चाची तरतूद करावी, पदे वाढवून कृषी सहाय्यकांच्या पदोन्नतीमधील अडचणी दूर कराव्यात. पोखरा योजनेत समुह सहाय्यकांची पदे पूर्वीप्रमाणे भरावी, मनरेगा योजनेत उद्दिष्ट्ये देताना क्षेत्रीय अडचणी विचारात घ्याव्यात, नैसर्गिक आपत्तीच्या पंचनाम्याबाबत नियमावली निश्चित करावी, सिल्लोड येथील कृषी सहाय्यकाच्या आत्महत्येप्रकरणी दोषींवर कारवाई करावी, कृषी सहाय्यक संवर्गाच्या आस्थापना विषयक अडचणी सोडवाव्यात आदी अनेक मागण्यासाठी कृषी सहाय्यकांच्या राज्य संघटनेने वेळोवेळी आवाज उठवला आहे. याबाबत शासनासोबत चर्चाही झाली परंतु ठोस निर्णय झाला नाही. याबाबत त्वरित निर्णय घ्यावा अन्यथा संघटनेने आंदोलनाचा मार्ग स्वीकारण्याचा निर्णय घेतला आहे असा ईशारा निवेदनाद्वारे दिला होता.
त्यानुसार कृषी सहाय्यक संघटनेने दि. ५ मे रोजी काळ्या फिती लावून निषेध करत आंदोलनास सुरुवात केली. त्यानंतर दि.६ मे रोजी कृषी सहाय्यक शासकीय व्हाट्सएप ग्रुप मधून बाहेर पडले. बुधवारी (दि. ७) तालुका कृषी अधिकारी कार्यालयासमोर धरणे आंदोलन केले आहे. दि.८ रोजी सामूहिक रजा, दि. ९ रोजी ऑनलाईन कामावर बहिष्कार तसेच त्यानंतरही मागण्या मान्य झाल्या नाहीत तर दि. १५ मे पासून बेमुदत कामबंद आंदोलन करण्याचा ईशारा कृषी सहाय्यकांनी दिल्याचे तालुकाध्यक्ष नागेश जट्टे यांनी सांगितले.
या धरणे आंदोलनात बाळासाहेब बिराजदार, शैलेश जट्टे, राहुल चेंडके, दीपक जाधव, आय.डी. पाटील, किशोर गायकवाड, चंद्रकांत पाटील, सुरेश मारूबले, ज्योती पवार, मनीषा जाधव, किरण जाधव, चिदानंद स्वामी, सचिन पवार, सचिन चेंडकाळे, माधव बिराजदार, निळकंठ पाटील, अतुल बिराजदार, नितीन चेंडकाळे, गणेश बिराजदार, विक्रम निकम, चंद्रकांत पाटील, विशाल पवार, उमाकांत बिराजदार, प्रमोद पवार आदी कृषी सहाय्यक यावेळी सहभागी झाले होते.
