लोहारा येथे जिल्हाधिकारी यांनी केली एसआयआर मोहिमेची पाहणी

लोहारा तालुक्यात सुरू असलेल्या एसआयआर (विशेष सखोल पुनरीक्षण) मोहीम कामकाजाची प्रत्यक्ष पाहणी करण्यासाठी धाराशिवचे जिल्हाधिकारी कीर्ती किरण पूजार यांनी नुकतीच लोहारा येथे भेट दिली. या भेटीदरम्यान त्यांनी तालुक्यातील एसआयआर मोहिमेच्या कामकाजाचा सविस्तर आढावा घेतला. तसेच अधिकारी आणि कर्मचाऱ्यांना आवश्यक मार्गदर्शन केले.
सोमवारी (दि.१३) जिल्हाधिकारी कीर्ती किरण पूजार हे दौऱ्यावर होते. यावेळी त्यांनी लोहारा येथे भेट देऊन मोहिमेचा आढावा घेतला. या दरम्यान जिल्हाधिकाऱ्यांनी प्रत्यक्ष काम करणाऱ्या सर्व बीएलओ यांच्याशी संवाद साधला. ऑनलाइन कामकाज करताना येणाऱ्या तांत्रिक अडचणी, शंका आणि प्रत्यक्ष फील्ड स्तरावरील समस्या त्यांनी जाणून घेतल्या. या सर्व शंकांचे निरसन करत जिल्हाधिकाऱ्यांनी कामकाजाचा वेग वाढवण्याच्या स्पष्ट सूचना दिल्या. तसेच, मोहिमेबाबत स्थानिक नागरिकांशी संवाद साधून त्यांना एसआयआर चे महत्त्व समजावून सांगितले. तसेच सर्व क्षेत्रीय अधिकाऱ्यांनी प्रत्यक्ष लक्ष घालून या मोहिमेला गती देणे आवश्यक आहे. बीएलओ यांच्याकडून सर्व प्रलंबित आणि ऑनलाईन कामकाज विहित कालमर्यादेत पूर्ण करून घ्यावे असे निर्देश जिल्हाधिकाऱ्यांनी यावेळी सर्व संबंधित अधिकाऱ्यांना दिले.

यावेळी जिल्हाधिकारी पूजार यांनी लोहारा तालुक्यातील सर्व बीएलओ यांच्या कामकाजाबाबत समाधान व्यक्त केले. तसेच हे काम सुरळीत पार पाडण्यासाठी तहसीलदार, नायब तहसीलदार, नियंत्रण कक्ष आणि क्षेत्रीय अधिकारी यांनी केलेल्या सूक्ष्म नियोजनाचे व व्यवस्थापनाचे विशेष कौतुक केले. या मोहिमेत कोणतीही त्रुटी राहू नये यासाठी त्यांनी प्रशासकीय यंत्रणेला मार्गदर्शन केले. याप्रसंगी तहसिलदार रणजितसिंह कोळेकर, नायब तहसिलदार अनिल अहिरे, मुख्याधिकारी लक्ष्मण कुंभार, वजीर अत्तार, महसूल विभागाचे अधिकारी/कर्मचारी, क्षेत्रीय अधिकारी, नियंत्रण कक्षाचे कर्मचारी आणि बीएलओ उपस्थित होते.