लोहारा येथील श्रीगिरे हॉस्पिटल आणि विमल आय हॉस्पिटल, लातूर यांच्या संयुक्त विद्यमाने शुक्रवारी (दि.१) महाराष्ट्र दिन आणि कामगार दिनाचे औचित्य साधून लोहारा येथे मोफत नेत्रतपासणी शिबिर आयोजित करण्यात आले होते.
या मोफत नेत्र शिबिरात सहभागी झालेल्या लाभार्थ्यांची दृष्टी (दृष्टीदोष) आणि डोळ्यांच्या आजारांसाठी तपासणी करण्यात आली. जवळपास १५० व्यक्तींची डोळ्यांच्या आजारांसाठी विविध अत्याधुनिक मशीनद्वारे तपासणी करण्यात आली. या शिबिराचे उदघाटन सहाय्यक पोलीस निरीक्षक विजय पवार यांच्या हस्ते करण्यात आले. या शिबिरासाठी माजी सरपंच नागन्ना वकील, चंद्रकांत पाटील, उपनगराध्यक्ष अमीन सुंबेकर, शंकर जट्टे, मंडळ अधिकारी जगदीश लांडगे, डॉ. हेमंत श्रीगिरे, डॉ.रुपाली श्रीगिरे, विमल आय हॉस्पिटलचे डॉ.दत्तात्रय शिंदे, नगरसेवक दिपक मुळे, उत्तम पाटील, रघुवीर घोडके, भगवान पाटील, अमोल वाले, प्रा. शहाजी जाधव यांच्यासह नागरिक, रुग्ण मोठ्या संख्येने उपस्थित होते.
या शिबिरात लोहारा येथील स्वप्नील भगवान पाटील यांनी एम.बी.बी.एस. वैद्यकीय शिक्षण पूर्ण केल्याबद्दल आणि शिक्षिका सौ. सविता शहाजी जाधव यांना राज्यस्तरीय शिक्षक पुरस्कार मिळाल्याबद्दल त्यांचा सत्कार करण्यात आला. शिबिर यशस्वी करण्यासाठी सद्दाम जमादार, गुरु लामतुरे, सुदर्शन जगताप व हॉस्पिटलचा सर्व स्टाफ यांनी यांनी विशेष परिश्रम घेतले.
