लोहारा पंचायत समिती कार्यालयातील सभागृहात शुक्रवारी (दि.२९) जलजीवन मिशन अंतर्गत जिल्हा परिषद पाणी व स्वच्छता विभागाच्या वतीने एकदिवसीय पाणी गुणवत्ता विषयक तालुकास्तरीय प्रशिक्षण कार्यशाळा घेण्यात आली. या कार्यशाळेस तालुक्यातील वैद्यकिय अधिकारी, आरोग्य पर्यवेक्षक, आरोग्य सेवक, ग्रामसेवक, उप विभागीय प्रयोग शाळेचे रसायनी अनुजैविक कर्मचारी आदी उपस्थित होते.
पंचायत समिती सभागृहात ही कार्यशाळा घेण्यात आली. कार्यशाळेस उपस्थित प्रशिक्षणार्थींना जिल्हा पाणी गुणवत्ता निरीक्षक हनुमंत गादगे, संजय जाधव, पाणी गुणवत्ता सल्लागार शुभम मगर यांनी मार्गदर्शन केले तसेच प्रात्यक्षिक करून दाखवले. पाण्याची सुरक्षितता अतिशय महत्त्वाची असून सर्वांसाठी शुद्ध पाण्याची उपलब्धता ही आपल्या सर्वांची जबाबदारी आहे. ग्रामीण भागातील जनतेला शुद्ध व सुरक्षित पिण्याच्या पाण्याचा पुरवठा करणे व जलजन्य आजारांवर नियंत्रण ठेवणे हा पाणी गुणवत्ता सनियंत्रण व सर्वेक्षण कार्यक्रमाचा प्रमुख उद्देश आहे. त्यामुळे यासाठी प्रभावीपणे अमलबजावणीसाठी सर्वांनी काम करणे आवश्यक आहे अशा सूचना यावेळी करण्यात आल्या.
यावेळी पाण्यापासून होणाऱ्या विविध आजाराविषयी माहिती देण्यात आली. तसेच त्यावर करण्यात येणाऱ्या प्रतिबंधात्मक उपाययोजनाबाबत विस्तृत मार्गदर्शन केले. दुपारच्या सत्रात पाणी गुणवत्ता निरीक्षक संजय जाधव व पाणी गुणवत्ता सल्लागार शुभम मगर यांनी पाणी नमुना संकलन पद्धत, एफटीके किट तसेच पाण्याची जैविक व रासायनिक तपासणी याबाबत माहिती दिली. हनुमंत गादगे यांनी सूत्रसंचालन केले. या कार्यशाळेस विस्तार अधिकारी जे. टी. वग्गे, प्रशासन अधिकारी नागनाथ कुंभार, तालुका समन्वयक दिलीप चव्हाण, कनिष्ठ सहाय्यक बी.बी. कुंभार उपस्थित होते.