लोहारा (Lohara) तालुक्यातील जिल्हा परिषदेच्या चार गटांसाठी व पंचायत समितीच्या आठ गणांसाठी झालेल्या निवडणुकीची मतमोजणी लोहारा तहसिल कार्यालयात सोमवारी (दि.९) पार पडली. तालुक्यातील तीन गटात व आठ गणात महायुतीच्या उमेदवारांनी विजय मिळवला आहे. तर एका गटात उबाठा पक्षाच्या उमेदवाराचा विजय झाला. निकाल जाहीर होताच विजयी उमेदवारांच्या समर्थकांनी तहसिल कार्यालयासमोर मोठ्या उत्साहात जल्लोष केला.
तालुक्यातील जिल्हा परिषदेच्या चार गटांसाठी व पंचायत समितीच्या आठ गणांसाठी शनिवारी (दि.७) मतदान पार पडले. या निवडणुकीसाठी २७२१७ पुरुष व २४०२२ स्त्री असे एकूण ५१२३९ मतदारांनी मतदानाचा हक्क बजावला होता. लोहारा तालुक्यात ५७.३२ टक्के मतदान झाले होते. जिल्हा परिषदेच्या चार गटांसाठी एकूण १५ तर पंचायत समितीच्या आठ गणांसाठी एकूण ३० उमेदवार निवडणूक रिंगणात होते. उमेदवारांच्या प्रचारासाठी नेत्यांनी सभा घेत प्रचार केला होता. तर उमेदवारांनी आपापल्या परीने मतदारांच्या गाठीभेटी घेत प्रचार केला. या निवडणुकीत उमेदवारांनी, त्यांच्या कार्यकर्त्यांनी एकमेकांवर टीका केल्याचे दिसून आले. मतदानादिवशी काही ठिकाणी झालेल्या किरकोळ वाद वगळता सर्वत्र शांततेत मतदान पार पडले. सर्वांना निकालाची उत्सुकता लागली होती. त्यामुळे प्रत्येक गट, गणात निकाल कसा लागणार याचीच चर्चा सुरू होती.
लोहारा तहसिल कार्यालयात सोमवारी (दि.९) सकाळी दहा वाजता मतमोजणीस सुरुवात झाली. सुरुवातीला टपाली मतदान मोजण्यात आले. त्यानंतर कानेगाव गटाची मतमोजणी करण्यात आली. यात कानेगाव गटातून शिवसेनेच्या सुवर्णा पाटील ह्या ८१४४ मते घेत विजयी झाल्या. याठिकाणी उबाठाच्या उमेदवार प्रतिभा कदम ( ४५५० मते ) यांचा पराभव झाला. कानेगाव गणात शिवसेनेचे अमोल पाटील व भातागळी गणात भाजपाचे दत्तात्रय वाघमारे विजयी झाले. त्यानंतर माकणी गटाची मतमोजणी करण्यात आली. माकणी गटातून उबाठा पक्षाच्या अश्विनी जवळगे ह्या ६२८० मते घेत विजयी झाल्या. याठिकाणी माकणी गणातून पल्लवी जानकर व धानुरी गणातून भाजपाचे नागनाथ पाटील विजयी झाले. त्यानंतर सास्तुर गटाची मतमोजणी झाली. याठिकाणी राष्ट्रवादी काँग्रेसच्या रोहिणी कोकणे ह्या ५५७४ मते घेत विजयी झाल्या. सास्तुर गणातून शिवसेनेच्या प्रगती घोटाळे व तावशीगड गणातून राष्ट्रवादी काँग्रेसच्या मालन कांबळे विजयी झाल्या. शेवटी जेवळी गटाची मतमोजणी झाली. या गटात शिवसेनेचे जिल्हाप्रमुख मोहन पनुरे यांची कन्या श्रुती पनुरे ह्या ६६६५ मते घेत विजयी झाल्या. याठिकाणी जेवळी गणात भाजपाचे स्वप्नील कारभारी व अचलेर गणात शिवसेनेच्या अल्का सुलतानपुरे विजयी झाल्या.
निकाल काय लागणार या उत्सुकतेने तालुक्यातील कार्यकर्त्यांनी तहसिल कार्यालयासमोर सकाळपासून गर्दी केली होती. जसे जसे निकाल जाहीर होत होते तसे कार्यकर्ते मोठ्या उत्साहात जल्लोष करताना दिसत होते. यावेळी जोरदार घोषणाबाजी करण्यात आली. तसेच तहसिल कार्यालयापासून विजयी उमेदवारांची मिरवणूक काढण्यात आली.
महायुतीचे वर्चस्व
लोहारा तालुक्यात चार गट व आठ गण आहेत. याठिकाणी चार गटांपैकी शिवसेनेने दोन, राष्ट्रवादी काँग्रेसने एक व उबाठाने एका जागेवर विजय. तर आठ गणांपैकी शिवसेना चार, भाजपा तीन व राष्ट्रवादी काँग्रेसने एका जागेवर विजय मिळवला. चार गटांपैकी तीन गटात महायुती तर एका गटात उबाठा पक्षाचे उमेदवार विजयी झाले. तसेच महायुतीने सर्वच आठ ठिकाणी विजय मिळवला.
विजयी उमेदवार
कानेगाव गट
सुवर्णा पाटील – शिवसेना
माकणी गट
अश्विनी जवळगे – उबाठा
सास्तुर गट
रोहिणी कोकणे – राष्ट्रवादी काँग्रेस
जेवळी गट
श्रुती पनुरे – शिवसेना
गण – विजयी उमेदवार
कानेगाव – अमोल पाटील – शिवसेना
भातागळी – दत्तात्रय वाघमारे – भाजपा
माकणी – पल्लवी जानकर – शिवसेना
धानुरी – नागनाथ पाटील – भाजपा
सास्तुर – प्रगती घोटाळे – शिवसेना
तावशीगड – मालन कांबळे – राष्ट्रवादी काँग्रेस
जेवळी – स्वप्नील कारभारी – भाजपा
अचलेर – अल्का सुलतानपुरे – शिवसेना
