लोहारा येथील न्यू व्हिजन इंग्लिश स्कुलच्या विद्यार्थ्यांचा मान्यवरांच्या हस्ते सन्मान

धाराशिव भारत स्काऊट गाईड जिल्हा कार्यालय, जिल्हा परिषद शिक्षण विभाग यांच्या संयुक्त विद्यमाने येरमाळा येथील विद्यानिकेतन विद्यालयामध्ये जिल्हा मेळावा संपन्न झाला. लोहारा शहरातील न्यू व्हिजन इंग्लिश स्कुल मध्ये सोमवारी (दि.१०) या मेळाव्यातील यशस्वी विध्यार्थ्यांना उपनगराध्यक्ष अमीन सूंबेकर यांच्या हस्ते बक्षिस वितरण करण्यात आले.
लोहारा शहरातील न्यू व्हिजन इंग्लिश स्कुलमध्ये झालेल्या या कार्यक्रमात लोहारा नगरपंचायत उपनगराध्यक्ष अमीन सूंबेकर, स्काऊट मास्टर नागेश ढगे, स्कुलचे प्राचार्य शहाजी जाधव यांची प्रमुख उपस्थिती होती. स्काऊट गाईड जिल्हा मेळाव्यामध्ये धाराशिव जिल्ह्यातील अनेक शाळांनी सहभाग नोंदवला होता. याप्रसंगी भव्य शेकोटी, शोभायात्रा, तंबू सजावट, बिन भांड्याचा स्वयंपाक, प्रशमंजुषा अशा विविध स्पर्धा घेण्यात आल्या. या मेळाव्यातील यशस्वी विध्यार्थ्यांना उपनगराध्यक्ष अमीन सुंबेकर व स्काऊट मास्टर नागेश ढगे यांच्या हस्ते बक्षीस वितरण करण्यात आले. या कार्यक्रमाप्रसंगी लोहारा नगर पंचायतच्या उपनगराध्यक्ष पदी नुकतीच निवड झाल्या बद्दल अमीन सुंबेकर यांचा व प्रमूख अतिथी नागेश ढगे यांचा स्कुलतर्फे सत्कार करण्यात आला. यावेळी लोहारा येथील न्यू व्हिजन इंग्लिश स्कूलमधील बनी – टमटोला व बुलबुल विभागातील लहान चिमुकल्यांनी जिल्हा मेळाव्यातील भव्य शेकोटिनिमित्त आयोजित सांस्कृतिक कार्यक्रमात मोबाईलचा अतिवापरामुळे मानवी जीवनात होणारे दुष्परिणाम हा सामजिक संदेश दिला. फुले – सावित्री नसती तर आज मुलगी शिकली असती का या गीतावर अतिशय सुंदर नृत्य सादर करून उपस्थितांची मने जिंकली. या मेळाव्यामध्ये यश प्राप्त केलेल्या विध्यार्थ्यांना व त्यांच्या मार्गदर्शक शिक्षिका सविता जाधव, हेमा पाटील यांना मान्यवरांच्या हस्ते प्रमाणपत्र व स्मृतिचिन्ह वाटप करण्यात आले. कार्यक्रमाचे सुत्रसंचालन प्रा. यशवंत चंदनशिवे यांनी तर सिद्धेश्वर सुरवसे यांनी आभार मानले. यावेळी स्कूलमधील सर्व विद्यार्थी व शिक्षक कर्मचारी उपस्थित होते.