लोहारा शहरातील शासकीय औद्योगिक प्रशिक्षण संस्थेचे नामकरण करण्यात आले असून स्वामी रामानंद तीर्थ शासकीय औद्योगिक प्रशिक्षण संस्था असे नामकरण करण्यात आले आहे.
महाराष्ट्र शासनाच्या कौशल्य, रोजगार, उद्योजकता व नाविन्यता विभागाने याबाबत दि.१५ जानेवारी रोजी शासन निर्णय प्रसिद्ध केला आहे. राज्यात शासकीय व खाजगी औद्योगिक प्रशिक्षण संस्थांमार्फत (आयटीआय) शिल्पकारागीर प्रशिक्षण योजनेअंतर्गत (सिटीएस) प्रशिक्षण देण्यात येते. या योजनेचा मुख्य उद्देश हा युवकांना रोजगाराभिमुख प्रशिक्षण देवून त्यांना रोजगार व स्वयंरोजगारासाठी सक्षम बनविणे व खाजगी औद्योगिक आस्थापनांना लागणाऱ्या कुशल मनुष्यबळाचा पुरवठा करणे असा आहे. सद्यस्थितीत राज्यात ४१९ शासकीय औद्योगिक प्रशिक्षण संस्था व ५८५ खाजगी औद्योगिक प्रशिक्षण संस्था कार्यरत आहेत. दि. ०८ ऑक्टोबर, २०२४ रोजीच्या शासन निर्णयानुसार मा. मंत्री (कौ.रो.उ. व ना.) विभाग यांची एकसदस्यीय समिती त्या जिल्हयाचे पालकमंत्री यांच्याशी विचारविनिमय करुन नावात बदल करणेबाबत निर्णय घेण्यात येईल असा निर्णय घेण्यात आला आहे. त्या अनुषंगाने १३२ शासकीय औद्योगिक प्रशिक्षण संस्थांची नावे बदलण्याबाबतची बाब शासनाच्या विचाराधिन होती असे या शासन निर्णयातील प्रस्तावनेत म्हणले आहे.
त्यानुसार राज्यातील १३२ शासकीय औद्योगिक प्रशिक्षण संस्थाचे नांव बदलण्यास खालीलप्रमाणे मान्यता देण्यात येत आहे असे या निर्णयात म्हणले आहे. या शासन निर्णयात औद्योगिक प्रशिक्षण संस्थेचे प्रस्तावित जिल्हा निहाय नावांची यादी देण्यात आली आहे. त्यानुसार शासकीय औद्योगिक प्रशिक्षण संस्थांच्या नावात बदल करण्यास देण्यात आलेल्या मान्यतेस अनुसरुन संचालक, व्यवसाय शिक्षण व प्रशिक्षण संचालनालय यांनी पुढील आवश्यक कार्यवाही करावी असे या निर्णयात नमूद केले आहे. या शासन निर्णयानुसार लोहारा शहरातील शासकीय औद्योगिक प्रशिक्षण संस्था ही यापुढे स्वामी रामानंद तीर्थ शासकीय औद्योगिक प्रशिक्षण संस्था या नावाने ओळखली जाणार आहे.
——-
लोहारा शहरातील शासकीय औद्योगिक प्रशिक्षण संस्थेस स्वामी रामानंद तीर्थ यांचे नाव देण्यात यावे यासाठी शासन स्तरावर पाठपुरावा केला होता. अखेर याबाबत शासन निर्णय घेण्यात आल्याने राज्य शासनाचा आभारी आहे.
ज्ञानराज चौगुले,
माजी आमदार
