लोहारा (lohara) तालुक्यातील जेवळी (jewli) येथे ग्रामदैवत महात्मा बसवेश्वरांच्या यात्रेनिमीत्त दि. ८ ते १० मे या कालावधीत सालाबादप्रमाणे राज्यस्तरीय खुल्या नृत्य स्पर्धेचे आयोजीत करण्यात आले आहे. या तीन दिवसीय राज्यस्तरीय खुल्या नृत्य स्पर्धेसाठी यात्रा समितीच्या वतीने विजेत्यांसाठी एकूण दोन लाख रुपयाचे रोख पारितोषिक व चषक ठेवण्यात आले आहे.
ग्रामदैवत महात्मा बसवेश्वरांच्या जयंतीनिमित्त तालुक्यातील जेवळी येथे अक्षयतृतीयापासुन तीन दिवस मोठी यात्रा भरते. या यात्रेनिमित्त येथे विविध धार्मिक, सांस्कृतिक कार्यक्रम आयोजित केले जातात. यावर्षी ही यात्रा दि. १० ते १२ या कालावधीत पार पडत आहे. गेल्या सोळा वर्षापासून यात्रा समितीच्या वतीने राजस्तरीय नृत्य स्पर्धा घेतली जात आहे. या स्पर्धेसाठी राज्यभरातून स्पर्धक सहभागी होतात. या वर्षी बुधवारी (दि.८) पासून या स्पर्धेला सुरुवात होत असून या दिवशी सोळा वर्षी खालील (बालगट) वैयक्तिक व समूह नृत्य स्पर्धा पार पडणार आहे. यात वैयक्तिक बालगट विजेत्यांना प्रथम पारितोषिक सात हजार रुपये, द्वितीय पाच हजार, तृतीय तीन हजार पाचशे रुपये व चषक देण्यात येणार आहे. याच दिवशी बाल समुह नृत्य स्पर्धा होणार आहे. यासाठी विजेत्यांना प्रथम पारितोषिक अकरा हजार, द्वितीय सात हजार, तर तृतीय पारितोषिक पाच हजार रुपये देण्यात येणार आहे. गुरुवारी (दि.९) प्रौढ गटातील नृत्य स्पर्धा होईल. यात लावणी व वैयक्तिक नृत्य (स्त्री) स्पर्धेसाठी प्रथम पारितोषिक पंधरा हजार रुपये, द्वितीय दहा हजार, तृतीय सात हजार रुपये ठेवण्यात आली आहे. याच दिवशी पुरुष लावणी व वैयक्तिक नृत्य स्पर्धाही होईल. यासाठी प्रथम पारितोषिक दहा हजार, द्वितीय सात हजार, तृतीय पाच हजार रुपये ठेवण्यात आले आहे. शुक्रवारी (दि.१०) प्रौढ गटातील युगल नृत्य व समुह नृत्य स्पर्धा होईल. युगल नृत्यासाठी प्रथम पारितोषिक दहा हजार, द्वितीय सात हजार, तृतीय पाच हजार रुपये ठेवण्यात आले आहे. याच दिवशी होणाऱ्या प्रौढ गटातील समुह नृत्यस्पर्धेसाठी प्रथम पारितोषिक हे तेत्तीस हजार, द्वितीय पंचवीस हजार, तृतीय एकवीस हजार रुपये व चषक ठेवण्यात आले आहे. अशी माहिती यात्रा समितीच्या वतिने देण्यात आली आहे. या यात्रेनिमित्त दरवर्षी प्रमाणे विविध कार्यक्रमांचे आयोजन करण्यात आले आहे.
