लोहारा तालुक्यातील धानुरी येथील विद्यामाता इंग्लिश स्कूलमध्ये शनिवारी (दि.२२) वार्षिक स्नेहसंमेलन आयोजन करण्यात आले होते. या कार्यक्रमात स्कुलच्या विद्यार्थ्यांनी विविध गीतांवर बहारदार नृत्य सादर करत उपस्थितांची मने जिंकली.
या स्नेह संमेलन कार्यक्रमाचे उद्घाटन आमदार प्रवीण स्वामी यांच्या हस्ते करण्यात आले. कार्यक्रमाच्या अध्यक्षस्थानी शेतकरी विकास संस्थेचे अध्यक्ष अशोकराव जवळगे हे होते. यावेळी संस्थेचे सचिव किशोर साळुंके, माकणीच्या सरपंच स्वाती साठे, सतीश साळुंके, पंडित ढोणे, नागनाथ पवार, स्कुलच्या मुख्याध्यापिका हिरा सोलापूरे यांची प्रमुख उपस्थिती होती. उपस्थित सर्व मान्यवरांचा शाळेच्या वतीने यथोचीत सत्कार करण्यात आला. मुख्याध्यापिका हिरा सोलापूरे यांनी कार्यक्रमाचे प्रास्ताविक केले. यावेळी आमदार प्रवीण स्वामी यांनी उपस्थितांना मार्गदर्शन केले. ते म्हणाले की, विद्यार्थी, शिक्षक, मुख्याध्यापक, पालक आणि समाज हे घटक जर एकत्रित आले तर शाळेचा विकास झाल्याशिवाय राहत नाही. या ठिकाणी ते सगळे घटक त्यांच्यासोबत संस्थाचालक सगळे एक दिलाने काम करत असल्यामुळे आपल्याला या शाळेची उन्नती झाल्याची दिसून येते. विद्यार्थ्यांनो, विविध स्पर्धेत यश मिळवून आपल्या शाळेचे तालुक्याचे नाव उज्वल करा असे आवाहन त्यांनी यावेळी केले.
या स्नेहसंमेलनात शाळेतील जवळपास ५५० विद्यार्थ्यांनी सहभाग नोंदवला होता. वार्षिक स्नेहसंमेलनाची सुरुवात महाराष्ट्राची कुलस्वामिनी आई तुळजाभवानी चा जोगवा या गाण्याने झाली. स्नेहसंमेलनामध्ये मिलिटरी सॉंग, माधुरी मिक्स, एसआरके, शिव तांडव, कोळी गीत, पंजाबी गीत, दादा कोंडके, शेतकरी गीत, कॉमेडी सॉंग व लावणीने सर्व उपस्थितांची मने जिंकली. यावेळी सर्वांचे आकर्षण ठरले छत्रपती संभाजी महाराज यांची नाटिका. शेखर स्वामी, उमेश खमीतकर, गजानन माळी यांच्या कल्पनेतून नाटिका साकारली गेली. महाराष्ट्रीयन थीम मध्ये संपूर्ण महाराष्ट्रातील सण, उत्सव यांचा देखावा करण्यात आला. या कार्यक्रमासाठी मुलांचे कौतुक करण्यासाठी पालकांची मोठ्या प्रमाणात उपस्थिती होती. पालकांमध्ये एक प्रकारचे आनंदाचे वातावरण दिसून आले. मुख्याध्यापिका हिरा सोलापूरे यांच्या नियोजनाखाली कार्यक्रम घेण्यात आला. कार्यक्रमाचे सूत्रसंचालन ओम सूर्यवंशी, महादेवी गिराम, संस्कार म्हमाणे, आरोही तडलगे, संस्कृती गायकवाड यांनी केले. या वार्षिक स्नेहसंमेलनाची सांगता जय जवान जय किसान या गाण्याने करण्यात आली. सुनील कांबळे यांनी आभार मानले.
