आता नगरपरिषदा व नगरपंचायतींचे अध्यक्ष होणार थेट जनतेमधून – विधेयक विधानसभेत बहुमताने मंजूर

वार्तादूत – डिजिटल न्युज नेटवर्क
नगरपरिषदा व नगरपंचायतींचे अध्यक्ष हे थेट जनतेमधून निवडण्याबाबतचे विधेयक विधानसभेत बहुमताने मंजूर करण्यात आले आहे. मुख्यमंत्री एकनाथशिंदे यांनी हे विधेयक मांडले.
विधेयकावरील चर्चेवर बोलताना मुख्यमंत्री एकनाथ शिंदे म्हणाले की, महाराष्ट्र नगरपरिषदा, नगर पंचायती व औद्योगिक नगरी (सुधारणा) विधेयकांत १९७४ पासून सुधारणा केली जात आहे. राज्य शासन जनतेच्या हिताचे निर्णय घेत आहे. नगराध्यक्षाला वाढीव अधिकार देण्याबाबत राज्यशासन सकारात्मक असून त्यानुसार आवश्यकता असल्यास विधेयकात फेरबदल करता येईल. पारदर्शक कारभारासाठी जनतेतून नगराध्यक्षाची निवड करण्यासंदर्भातील विधेयक महत्त्वपूर्ण आहे, असेही मुख्यमंत्री एकनाथ शिंदे यांनी सांगितले.

नऊ हजार ग्रामपंचायतींचा ठराव

थेट जनतेतून सरपंच निवडण्याचा निर्णय राज्य शासनाने घेतला. या निर्णयाच्या समर्थनार्थ राज्यातील नऊ हजार ग्रामपंचायतींनी ठराव केला असल्याची माहिती मुख्यमंत्री एकनाथ शिंदे यांनी विधानसभेत यावेळी बोलताना दिली.