लोहारा / प्रतिनिधी
लोहारा येथील किंग कोब्रा मित्र मंडळाच्या वतीने क्रिकेटच्या अनोख्या स्पर्धेचे आयोजन केले आहे. या स्पर्धेत फक्त ४ – ४ षटकाचे सामने होणार आहेत. शहरातील हायस्कुल लोहारा मैदानावर या टेनिस बॉल स्पर्धा संपन्न होणार आहेत.
या स्पर्धेचे उद्घाटन शुक्रवार दि. २५ डिसेंबर रोजी होणार आहे. या स्पर्धेमध्ये अंतिम सामन्यातील विजेत्या संघांस १५ हजार व चषक, उपविजेता संघास ११ हजार व चषक, तर तिसऱ्या विजेता संघास ७ हजार व चषक पारितोषिक देण्यात येणार आहे. तसेच विविध पारितोषिक देण्यात येणार आहे. तसेच मालिकावीर फलंदाज रुपये २ हजार पाचशे, उत्कृष्ट फलंदाज १ हजार एकशे, उत्कृष्ट गोलंदाज १ हजार एकशे, सलग तीन षटकार १ हजार एकशे, सलग तीन विकेट १ हजार एकशे रुपये आदी वैयक्तिक पारितोषिक ठेवण्यात आले आहे. या स्पर्धेसाठी प्रवेश फी ७०१ रुपये असणार आहे. तरी इच्छुक संघांनी नावनोंदणी करिता सुनिल शिंदे, ओम पाटील, सुवन डोकडे, स्वप्नील स्वामी, गणेश कुंभार, दिपक रोडगे यांच्याशी संपर्क साधावा असे आवाहन किंग कोब्रा मंडळाच्या वतीने करण्यात आले आहे. क्रिकेट मधील २०- २० सामन्यांमुळे क्रिकेट प्रेमींमध्ये क्रिकेट बद्दल वेगळीच उत्कंठा निर्माण झाली आहे. तसेच ग्रामीण भागात होणाऱ्या क्रिकेट स्पर्धेत १० षटके तर कुठे ८ षटकांचे सामने होतात. परंतु ही स्पर्धा ४ – ४ षटकांची असल्यामुळे लोहारा शहर व परिसरातील क्रिकेटप्रेमींमध्ये या स्पर्धेबद्दल अधिक उत्कंठा निर्माण झाली आहे.
