वार्तादूत – डिजिटल न्युज नेटवर्क
उस्मानाबाद शहरातील बॅनरबाजीचा विषय सध्या चांगलाच चर्चेत आला आहे. राष्ट्रवादी काँग्रेस पक्षाने बॅनरच्या माध्यमातून भाजपवर निशाणा साधला आहे.
मागील काही दिवसांपासून पेट्रोल, डिझेल, गॅस सिलेंडर च्या किंमती वाढत चालल्या आहेत. त्यामुळे नागरिकांतून तीव्र प्रतिक्रिया उमटत आहेत. अशातच भाजपवर निशाणा साधत उस्मानाबाद राष्ट्रवादी काँग्रेसने बॅनर लावले आहेत. राष्ट्रवादी काँग्रेस पक्षाकडून लावण्यात आलेल्या या बॅनरवर मोदी सरकारवर निशाणा साधण्यात आला आहे. ‘पेट्रोलचे दर शंभरी पार, शेअर बाजार खड्यात गेला, आकाशाला भिडलेली महागाई’ बेसुमार वाढलेली बेरोजगारी अशा आशयाचे मजकूर बॅनरवर छापण्यात आले आहे. तसेच बॅनरवर ‘थँक यू मोदी सरकार’ असे म्हणत उपरोधात्मक टोला लगावला आहे. या बॅनरची उस्मानाबाद शहरासह जिल्ह्यात चर्चा सुरू आहे.
