वार्तादूत – डिजिटल न्युज नेटवर्क
लोहारा तालुक्यातील वडगाववाडी येथील पाझर तलावाच्या दुरुस्ती कामाचे भूमिपूजन मृद व जलसंधारण तथा पालकमंत्री शंकरराव गडाख यांच्या हस्ते सोमवारी ( दि. २५) संपन्न झाले. मुख्यमंत्री जलसंधारण योजनेतून या तलावाच्या दुरुस्तीचे काम करण्यात येत आहे.
तालुक्यातील वडगाववाडी येथील पाझर तलावाचे काम १९९५ ला पूर्ण झाले होते. १४ ऑक्टोबर २०२० ला झालेल्या मुसळधार पावसामुळे या तलावाचे काही प्रमाणात नुकसान झाले होते. त्यामुळे तलावाला धोका निर्माण झाला आहे. या तलावाची दुरुस्ती करण्यात यावी अशी शेतकऱ्यांची मागणी होती. तसेच तलावाची दुरुस्ती करणे आवश्यक असल्याचे लक्षात आल्यानंतर जलसंधारण विभागाकडून या तलावाची दुरुस्ती करण्याचे निश्चित करण्यात आले. या दुरुस्ती कामाचे भूमिपूजन मृद व जलसंधारण तथा पालकमंत्री शंकरराव गडाख यांच्या हस्ते सोमवारी ( दि. २५) संपन्न झाले. यावेळी जिल्हाधिकारी कौस्तुभ दिवेगावकर, खासदार ओमप्रकाश राजेनिंबाळकर, आमदार ज्ञानराज चौगुले, उपविभागीय अधिकारी विठ्ठल उदमले, उपविभागीय पोलीस अधिकारी अनुराधा उदमले, तहसीलदार रोहन काळे, गटविकास अधिकारी एस. ए. अकेले, तालुका कृषी अधिकारी मिलिंद बिडबाग, वडगाववाडीच्या सरपंच वनमाला गिराम, पंचायत समितीच्या सभापती हेमलता रणखांब, जिल्हा परिषद सदस्या शोभा तोरकडे, माजी जिल्हा परिषद सदस्य गुंडू भुजबळ, शिवसेनेचे तालुकाप्रमुख मोहन पनुरे, युवासेना उपजिल्हाप्रमुख नामदेव लोभे, तालुकाप्रमुख अमोल बिराजदार, परवेज तांबोळी, शिवराज चिनगुंडे, सुरेश दंडगुले यांच्यासह जलसंधारण विभागाचे अधिकारी, विविध विभागाचे अधिकारी उपस्थित होते. या पाझर तलावाच्या दुरुस्तीचे काम पावसाळ्यापूर्वी पूर्ण होईल अशी माहिती उपस्थित जलसंधारण विभागाच्या अधिकाऱ्यांनी दिली आहे. या कामामुळे परिसरातील शेतीसाठी फायदा होणार आहे.
पालकमंत्री शंकरराव गडाख यांच्या हस्ते पालकमंत्री पानंद रस्ता मजबुतीकरण कामाचे ही भूमिपूजन करण्यात आले. वडगाव ते फनेपुर दरम्यान हा रस्ता होणार आहे.
