वार्तादूत – डिजिटल न्युज नेटवर्क
राज्यमंत्री संजय बनसोडे हे सोमवारी ( दि. १०) उस्मानाबाद येथे आले होते. यावेळी राष्ट्रवादी काँग्रेसचे लोहारा तालुकाध्यक्ष सुनील साळुंके यांनी त्यांची भेट घेऊन तालुक्यातील कोविड च्या सद्यस्थितीची माहिती देऊन वैद्यकीय उपाययोजना करण्यासंबंधी मागण्यांचे निवेदन दिले.
या निवेदनात म्हटले आहे की, सध्या कोरोनामुळे भीषण परिस्थिती निर्माण झाली आहे. लोहारा तालुक्यात कोरोना रुग्णांची संख्या दिवसेंदिवस वाढतच चालली आहे. सद्यस्थितीत तालुक्यात एकूण ५१० ऍक्टिव्ह रुग्ण आहेत. लोहारा तालुक्यात दोन ग्रामीण रुग्णालये, चार प्राथमिक आरोग्य केंद्र सोडली तर इतर कोणतीही वैद्यकीय व्यवस्था नाही. तसेच एखादे मोठे खाजगी रुग्णालयही नाही. त्यामुळे तालुक्यातील कोरोनाबाधित रुग्णांना उपचारासाठी मोठी गैरसोय होत आहे. नॉर्मल असलेल्या रुग्णांना लोहारा येथील कोविड सेंटरमध्ये ठेवले जात आहे. परंतु ज्यांची परिस्थिती गंभीर आहे, अशा रुग्णांना उमरगा, तुळजापूर, उस्मानाबाद याठिकाणी नेण्यात येते. परंतु सध्या तिथेही रुग्ण मोठ्या प्रमाणात असल्याने बेड उपलब्ध होणे अवघड झाले आहे. त्यामुळे लोहारा ग्रामीण रुग्णालयाच्या इमारतीत ऑक्सिजन बेड, व्हेंटिलेटर, कोनसेंट्रेटर व एम. डी. वैद्यकीय अधिकारी यांची उपलब्धता झाली तर येथेच उपचार करता येतील. त्यामुळे तालुक्यातील रुग्णांची गैरसोय होणार नाही. तसेच लोहारा तालुक्यात डेडीकेटेड कोविड हेल्थ सेंटर (डी सी एच सी ) उभारण्याची आवश्यकता आहे. त्यामुळे आपण आपल्या स्तरावरून संबंधितांशी बोलून सदरील सुविधा उपलब्ध करून घ्याव्यात अशी विनंती राज्यमंत्री संजय बनसोडे यांच्याकडे निवेदनाद्वारे केली आहे. यावेळी राष्ट्रवादी काँग्रेस डॉक्टर्स सेलचे प्रदेशाध्यक्ष डॉ. नरेंद्र काळे, जिल्हाध्यक्ष सुरेश बिराजदार, जिल्हा कोषाध्यक्ष जगदीश पाटील, माकणीचे सरपंच विठ्ठल साठे, उपसरपंच वामन भोरे आदी उपस्थित होते.
