लोहारा तालुक्यातील माकणी येथील भारत शिक्षण संस्थेचे कला, विज्ञान व वाणिज्य महाविद्यालयात पदवी अभ्यासक्रम प्रमाणपत्र वितरण समारंभ आयोजित करण्यात आला होता.
या कार्यक्रमासाठी डॉ. बाबासाहेब आंबेडकर मराठवाडा विद्यापीठ सबसेंटर धाराशिव येथील व्यवस्थापन शास्त्र विभागाचे संचालक डॉ. सुयोग अमृतराव, भारत शिक्षण संस्थेचे संचालक विठ्ठल नरसाळे, प्राचार्य डॉ. घनश्याम जाधव, ज्ञानप्रबोधिनी हराळी येथील गौरीताई कापरे, महाविद्यालयाचे उपप्राचार्य डॉ. धनाजी थोरे यांची प्रमुख उपस्थिती होती. या कार्यक्रमासाठी अनुग्रह करण्यासाठी कला विभागातून डॉ. किरण लोमटे व विद्यार्थी नावे घोषित करण्यासाठी डॉ. रुपचंद खराडे, विज्ञान विभागातून डॉ. बालाजी जावळे, डॉ. अतुल बिराजदार व वाणिज्य विभागातून प्रा. विठ्ठल साळुंके, प्रा. दत्ता माने व सुत्रसंचलन डॉ. धनाजी थोरे यांनी केले. या कार्यक्रमाप्रसंगी स्नातक विद्यार्थ्यांची नावे घोषित करण्यात आल्यानंतर डॉ. घनश्याम जाधव यांनी त्यास अनुमोदन दिले.
या कार्यक्रमाची सुरुवात विद्यापीठाचा ध्वज हातात घेऊन कार्यक्रमास्थळपर्यत नेवून करण्यात आली व त्यानंतर दिप प्रज्वलाने कार्यक्रमाची सुरुवात करण्यात आली. डॉ. सुयोग अमृतराव यांनी स्नातक विद्यार्थ्याना पदवी नंतर काय यावर सविस्तर मार्गदर्शन केले. विद्यार्थी जीवनातील हा एक महत्वाचा टप्पा असून विद्यार्थ्याना भरपूर संधी उपलब्ध आहेत. त्या संधीचा फायदा कसा घ्यावा याविषयी मार्गदर्शन केले. प्रत्येक विद्यार्थ्यांनी आपली शक्ती आणि आपल्यातील कमजोरी यांची प्रमुख मुद्दे मांडून कमजोर मुद्दे शक्तीदायक कसे करावे यावर भर द्यावा असेही नमुद केले. गौरीताई कापरे यांनीही विद्यार्थ्यांना मार्गदर्शन केले.
डॉ. घनश्याम जाधव यांनी स्नातक विद्यार्थ्यांना सखोल अभ्यास करून नोकरीसाठी कशी तयारी करावी याविषयी अधिक माहिती दिली. डॉ. किरण लोमटे यांनी आभार मानले. कार्यक्रमाची सांगता राष्ट्रगिताने झाली. भारत शिक्षण संस्थेचे अध्यक्ष अमोल मोरे व उपाध्यक्ष अश्लेष मोरे यांनी कार्यक्रम यशस्वी करण्यासाठी मार्गदर्शन केले. या कार्यक्रमासाठी महाविद्यालयाचे रजिस्ट्रार किशोर जगताप, रोखपाल संतोष सोमवंशी यांनी परिश्रम घेतले. कार्यक्रमानंतर सर्व स्नातक विद्यार्थ्यांना अल्पोपहार देण्यात आला. या कार्यक्रमाप्रसंगी महाविद्यालयाचे स्नातक विद्यार्थी बहुसंख्येने उपस्थित होते.
