लोहारा तालुक्यातील माकणी येथे मोफत आरोग्य शिबीर आयोजित करण्यात आले होते. या शिबिरात २११ रुग्णांची तपासणी करण्यात आली.
ग्रामीण भागातील जनतेला तज्ज्ञ डॉक्टरांच्या वैद्यकीय सेवा स्थानिक पातळीवर उपलब्ध करून देण्याच्या उद्देशाने, तेरणा स्पेशालिटी हॉस्पिटल आणि रिसर्च सेंटर (नेरूळ, नवी मुंबई) व ज्ञानज्योती फाउंडेशन (उमरगा) यांच्या संयुक्त विद्यमाने विठ्ठल रुक्माई मंदिर माकणी येथे मंगळवारी (दि. २६) मोफत आरोग्य शिबिराचे आयोजन करण्यात आले होते. या शिबिराला परिसरातील नागरिकांचा चांगला प्रतिसाद मिळाला असून २११ रुग्णांची मोफत आरोग्य तपासणी व समुपदेशन करण्यात आले.
शहरी भागाच्या तुलनेत ग्रामीण भागात अद्ययावत वैद्यकीय सेवा पोहोचवणे ही काळाची गरज बनली आहे. नेमका हाच धागा पकडून मुंबईच्या प्रसिद्ध तेरणा हॉस्पिटलने व ज्ञानज्योती फाउंडेशनने तालुक्यातील माकणी येथे या विशेष शिबिराचे आयोजन केले होते. मुंबईतील तज्ज्ञ डॉक्टरांनी थेट ग्रामीण भागात येऊन रुग्णांची तपासणी केल्यामुळे स्थानिक नागरिकांना मोठा दिलासा मिळाला. या शिबिरात हृदयविकार, मधुमेह, स्त्रीरोग, बालरोग, अस्थिरोग आणि सर्वसाधारण आजारांची मोफत तपासणी करून औषधोपचार करण्यात आले. या शिबिराचे उद्घाटन राष्ट्रवादी काँग्रेसचे नेते किशोर साठे, भाजपा तालुकाध्यक्ष राजेंद्र पाटील यांच्या हस्ते झाले. याप्रसंगी लोहारा पंचायत समितीच्या सभापती पल्लवी जानकर, उमरगा पं. स. सभापती ॲड. आकांक्षा चौगुले, सास्तूरच्या सरपंच शितल राहुल पाटील, भाजपा तालुकाध्यक्ष राजेंद्र पाटील, जिल्हा चिटणीस अनिल ओवांडकर, ग्रा.प. सदस्य निकेत पत्रिके, अण्णासाहेब साठे, शुभम साठे, राजवर्धन पाटील, ॲड. दादासाहेब जानकर, जिल्हा संयोजक दिलीप पवार, शुभम पाटील, दौलत पाटील तसेच ज्ञानज्योती फाउंडेशनचे कोषाध्यक्ष अमर देशाटवार आदी मान्यवर उपस्थित होते.
या शिबिराच्या माध्यमातून २११ रुग्णांची मोफत तपासणी करण्यात आली. यामधील ७७ रुग्णांना पुढील गंभीर व अद्ययावत उपचारांची आवश्यकता असल्याने, त्यांना योग्य मार्गदर्शन करण्यात आले आहे. या सर्व ७७ रुग्णांना पुढील उपचारासाठी नेरूळ, नवी मुंबई येथील तेरणा हॉस्पिटलमध्ये घेऊन जाण्यात येणार असून, त्यांच्यावर तेथे पुढील उपचार केले जातील. शिबिरात रुग्णांची तपासणी करण्यासाठी तेरणा हॉस्पिटलच्या नामांकित डॉक्टरांचे पथक उपस्थित होते. यामध्ये डॉ. अजित निळे, डॉ. शलोक मोदी, डॉ. आर्य गुप्ता, डॉ. दृष्टी शहा, प्रतीक लोखंडे, उंबरे सर, अभिजीत वालेकर, आणि विनोद ओहाळ यांनी रुग्णांची आस्थेवाईकपणे तपासणी केली. तसेच जनसंपर्क अधिकारी अमित सय्यद व श्रीहरी गरड यांनी शिबिराचे उत्कृष्ट नियोजन केले. या शिबिराला स्थानिक पातळीवर यशस्वी करण्यासाठी तालुका सरचिटणीस निकेश बचाटे, किशोर गायकवाड, अजय पाटील, विजय साळुंखे, अमोल राजपूत, समीर पठाण, रिहान शेख, प्रा. आ. केंद्राचे किशोर जाधव, आशा कार्यकर्ते व स्थानिक युवा कार्यकर्ते महिला यांनी परिश्रम घेतले.
