रासायनिक खताला पर्याय म्हणून सेंद्रीय निविष्टा – अतिरिक्त मुख्य कार्यकारी अधिकारी अनिलकुमार नवाळे – लोहारा तालुक्यातील बेंडकाळ येथील उमेद सेंद्रिय शेती सेवा केंद्रास दिली भेट

वार्तादूत – डिजिटल न्युज नेटवर्क
उमेद – महाराष्ट्र राज्य ग्रामीण जीवनोन्नती अभियान अंतर्गत लोहारा तालुक्यात महाराष्ट्र राज्य ग्रामिण जिवनोन्नती अभियान व राष्ट्रिय ग्रामिण आर्थिक परिवर्तन प्रकल्पांतर्गत तालुक्यात गटातील महिला शेतकरी यांच्यासाठी सेंद्रीय शेती अभियान चालु आहे. त्या अंतर्गत आजपर्यंत तालुक्यात एकुण २७ गावामध्ये २० सेंद्रीय गट स्थापन झाले असून सेंद्रिय शेती करत आहेत. सदर सेंद्रिय शेती करणाऱ्या अभियानातील बेंडकाळ येथील कृषी सखी लक्ष्मी मोरे यांनी सुरु केलेल्या उमेद सेंद्रिय शेती सेवा केंद्रास जिल्हा परिषदेचे अतिरिक्त मुख्य कार्यकारी अधिकारी तथा सह जिल्हा अभियान संचालक अनिलकुमार नवाळे यांनी सोमवारी (दि.२८) भेट देऊन पाहणी केली. सदर सेवा केंद्राच्या माध्यमातून रासायनिक खताला पर्याय म्हणून सेंद्रीय निविष्टा हा चांगला पर्याय असल्याचे मत अतिरिक्त मुख्य कार्यकारी अधिकारी अनिलकुमार नवाळे यांनी व्यक्त केले. सदर केंद्राच्या माध्यमातून कीड व रोग नियंत्रणासाठी सेंद्रीय निविष्ठा दशपर्णी अर्क, जिवामृत, वेस्ट डी कंपोजर, अग्निअस्त्र, व्हर्मी वॉश, गांडुळ खत इ. सेंद्रीय निविष्ठांचे वापर कसे करावे याची माहिती देण्यात येणार आहे. सेंद्रिय शेतीमुळे शेतकऱ्यांचा खर्च कमी होऊन उत्पनात वाढ झाली आहे. याबाबत अतिरिक्त मुख्य कार्यकारी अधिकारी अनिलकुमार नवाळे यांनी समाधान व्यक्त केले.तसेच तालुक्यात सेंद्रिय शेती साठी इच्छुक असणाऱ्या शेतकऱ्यांनी उमेद – महाराष्ट्र राज्य ग्रामीण जीवनोन्नती अभियान तालुका अभियान व्यवस्थापन कक्ष लोहारा यांच्याशी संपर्क साधावा असे आवाहन त्यांनी केले. यावेळी उपस्थित पंचायत समितीचे गटविकास अधिकारी सोपान अकेले, सहाय्यक गटविकास अधिकारी संजय ढाकणे, तालुका अभियान व्यवस्थापक अमोल कासार, तालुका समन्वयक नरेंद्र गवळी, प्रभाग समन्वयक सौरभ जगताप, कृषी सखी लक्ष्मी मोरे आदी उपस्थित होते.