वार्तादूत – डिजिटल न्युज नेटवर्क
लोहारा शहरातील अंतर्गत रस्त्यांच्या कामांसाठी ५ कोटी रुपयांचा निधी मंजूर झाल्याची माहिती आमदार ज्ञानराज चौगुले यांनी दिली आहे. महाराष्ट्र शासनाच्या नगरविकास विभागाकडून \’नव्याने स्थापन केलेल्या नगरपंचायतींना नागरी सुविधा पुरविण्यासाठी सहाय्य्य\’ योजनेअंतर्गत हा निधी मंजूर झाला असून यासाठी आमदार ज्ञानराज चौगुले यांनी नगरविकास विभागाकडे सातत्याने पाठपुरावा केला होता. या पाठपुराव्यास यश आले आहे. या निधीतून लोहारा शहरातील विविध प्रभातील महत्वाच्या रस्त्यांची कामे पूर्ण करण्यात येणार आहेत. यापूर्वी जिल्हा वार्षिक नियोजन अंतर्गत विविध प्रभागात भरघोस असा निधी प्राप्त करून घेऊन कामे पूर्ण करण्यात आली होती. परंतु अनेक प्रभागात विकासकामांना निधी प्राप्त न झाल्याने येथील समस्या कायम होत्या. या अनुषंगाने उर्वरित कामांसाठी सदर योजनेतून निधी मंजूर करून घेतला आहे. यापुढील काळातही लोहारा शहराच्या सर्वांगीण विकासासाठी भरघोस निधी उपलब्ध करून देण्याचे नगरविकास मंत्री एकनाथ शिंदे यांनी आश्वासित केल्याचे आमदार ज्ञानराज चौगुले यांनी सांगितले. सदरचा निधी मंजूर केल्याबद्दल आमदार ज्ञानराज चौगुले यांनी मुख्यमंत्री उद्धव ठाकरे, नगरविकास मंत्री एकनाथ शिंदे, पालकमंत्री शंकरराव गडाख-पाटील यांचे आभार मानले आहेत.
