लोहारा (Lohara) येथील न्यायालयात बुधवारी (दि.२१) वृक्षारोपण व वृक्षसंवर्धनाचा संदेश देणारा ‘हरित उपक्रम’ राबविण्यात आला. धाराशिव येथील प्रमुख जिल्हा व सत्र न्यायाधीश श्रीमती अभिश्री देव यांच्या मार्गदर्शनाखाली आणि लोहारा न्यायालयाचे दिवाणी न्यायाधीश शिवराज पाटील यांच्या पुढाकाराने हा उपक्रम राबविण्यात आला.
दुष्काळी परिस्थितीमुळे पर्यावरणाचा समतोल राखणे कठीण होत चालले आहे. या परिस्थितीत वृक्षारोपण करणे तसेच ती झाडे व्यवस्थित वाढविणे व ते जतन करणे खूप महत्वाचे आहे. याच विचारातून लोहारा येथील न्यायालयात न्यायाधीश शिवराज पाटील यांच्या पुढाकाराने हा हरित उपक्रम आयोजित करण्यात आला. आज पर्यावरणाचा समतोल राखण्यासाठी प्रत्येकाने आपापल्या परीने योगदान देणे आवश्यक आहे. वृक्षारोपण ही या दिशेने टाकलेली पहिली पायरी असली तरी लावलेले रोप जगवणे आणि त्याचे झाडात रूपांतर होईपर्यंत काळजी घेणे अत्यंत महत्त्वाचे आहे. त्यामुळे पर्यावरण संवर्धनाची जबाबदारी केवळ एखाद्या संस्था किंवा यंत्रणेपुरती मर्यादित न ठेवता ती प्रत्येकाने आपली सामूहिक जबाबदारी म्हणून स्वीकारली पाहिजे असे आवाहन यावेळी त्यांनी केले. न्यायालयीन कामासाठी अनेकजण न्यायालयात येतात. हा परिसर हिरवागार, सावलीयुक्त व्हावा हा या उपक्रमाचा उद्देश असल्याचे सांगण्यात आले. लोहारा न्यायालयातील या हरित उपक्रमातून प्रेरणा घेऊन प्रत्येकाने आपल्या घराच्या परिसरात, शेतात, गावात किमान एक तरी झाड लावावे आणि त्याचे जतन करावे अशी अपेक्षा यावेळी करण्यात आली. यावेळी न्यायाधीश शिवराज पाटील, सरकारी विधिज्ञ एस. व्ही. काळे, पी. एस. मुसांडे, एस.एन. बादुले, एम. व्ही. साठे, एस. आर. आडसुळे, एम. एस. वचने यांच्यासह न्यायालयीन कर्मचारी, पक्षकार व विधिज्ञ उपस्थित होते.
