हॅलो मेडिकल फाउंडेशनचे डॉ. शशिकांत अहंकारी यांचे निधन

आरोग्य क्षेत्रात मागील अनेक वर्षांपासून काम करणाऱ्या हॅलो मेडिकल फाउंडेशनचे संस्थापक अध्यक्ष डॉ. शशिकांत अहंकारी (७२ वर्षे) यांचे मंगळवारी (दि.८) सकाळी ७.३० च्या सुमारास निधन झाले. ही दुःखद बातमी कळताच अणदूर व परिसरातील गावात शोककळा पसरली. डॉ. शशिकांत अहंकारी यांच्यावर काही दिवसांपूर्वी पुण्यात उपचार सुरू होते. उपचार झाल्यानंतर ते पुण्यातील घरी विश्रांती घेत होते. अशातच मंगळवारी सकाळी त्यांचे निधन झाल्याची माहिती समोर येत आहे. डॉ. शशिकांत अहंकारी यांच्या पार्थिवावर तुळजापूर तालुक्यातील अणदूर येथे उद्या सकाळी अंत्यसंस्कार केले जाणार असल्याची माहिती त्यांच्या संस्थेच्या निकटवर्तीयाकडून देण्यात आली आहे. डॉ. शशिकांत अहंकारी हे उस्मानाबाद जिल्ह्यातील एक सामाजिक कार्यकर्ते म्हणून सुप्रसिद्ध होते. त्यांनी आरोग्य क्षेत्रात भरीव कामगिरी केली आहे.