लोहारा नगरपंचायतच्या विषय समितीच्या सभापती निवडी बिनविरोध ; कोणाला मिळाली संधी, वाचा सविस्तर

लोहारा नगरपंचायतच्या विषय समितीच्या सभापती, स्थायी व विषय समितीच्या सदस्यांच्या निवडीसाठी बुधवारी (दि.२१) नगरपंचायत सभागृहात विशेष सभा घेण्यात आली. निवडीनंतर नगरपंचायतीच्या वतीने सर्वांचा सत्कार करण्यात आला.
लोहारा नगर पंचायत सदस्यांचे स्थायी समिती, विषय समितीवर सदस्यांचे नामनिर्देशन तसेच विषय समितीचे सभापती निवडीसाठी महाराष्ट्र नगरपरिषद, नगर पंचायती व औद्योगिक नगरी अधिनियम १९६५ चे कलम ६३ (२), ६५ (४) अन्वये स्थायी समिती, विषय समित्यावर सदस्यांचे नामनिर्देशन करण्यासाठी व त्यांचे सभापती निवडण्यासाठी जिल्हाधिकारी सचिन ओम्बासे यांच्या आदेशाने लोहारा बु. नगर पंचायतच्या सभागृहात बुधवारी (दि.२१) सर्व सदस्यांची विशेष सभा घेण्यात आली. पिठासीन अधिकारी तथा तहसिलदार काशीनाथ पाटील व लोहारा बु. नगरपंचायतचे मुख्याधिकारी रामकृष्ण जाधवर यांच्या उपस्थितीत हा निवडीचा कार्यक्रम पार पाडले. या निवडी बिनविरोध पार पडल्या.
यात महिला व बाल कल्याण समितीच्या सभापती पदी संगीता किशोर पाटील यांची निवड झाली आहे. या समितीत सदस्य म्हणून सारिका बंगले, कमल भरारे, अमीन सुंबेकर, जालिंदर कोकणे यांचा समावेश आहे. सार्वजनिक कर संकलन, विकास, नियोजन व शिक्षण समितीच्या सभापती पदी उपनगराध्यक्ष आयुब शेख यांची निवड झाली आहे. या समितीत गौस मोमीन, सुमन रोडगे, शामल माळी, प्रशांत काळे यांचा समावेश आहे. सार्वजनिक आरोग्य, स्वच्छता व दिवाबत्ती समितीच्या सभापती पदी शामल माळी यांची निवड करण्यात आली आहे. या समितीत आरती कोरे, कमल भरारे, जालिंदर कोकणे, आरिफ खानापुरे यांचा समावेश आहे. सार्वजनिक बांधकाम व अर्थ समितीच्या सभापती पदी सुमन रोडगे यांची निवड झाली आहे. यात अमीन सुंबेकर, सारिका बंगले, जालिंदर कोकणे, विजयकुमार ढगे यांचा समावेश आहे. सार्वजनिक पाणीपुरवठा व जलनि:सारण समितीच्या सभापती पदी शमाबी शेख यांची निवड झाली आहे. यात सदस्य म्हणून गौस मोमीन, आरती कोरे, आरिफ खानापुरे, जालिंदर कोकणे यांचा समावेश आहे.

या निवडी झाल्यानंतर नगरपंचायतच्या वतीने सत्कार करण्यात आला. यावेळी तहसीलदार किशोर पाटील, मुख्याधिकारी रामकृष्ण जाधवर, आकांक्षा चौगुले, नगराध्यक्षा वैशाली खराडे, कार्यालयीन अधीक्षक जगदीश सोंडगे, जगन्नाथ पाटील, अभिमान खराडे, अविनाश माळी, दिपक रोडगे, प्रमोद बंगले, आयुब शेख, सुरेश दंडगुले, आदींसह नगरपंचायतचे कर्मचारी उपस्थित होते.