लोहारा शहरातील महाशिवरात्री (Mahashivratri) यात्रा महोत्सवास बुधवारी (दि.२६) मोठ्या उत्साहात सुरुवात झाली. यानिमित्त शहरातील जगदंबा मंदिरातून महादेवाच्या पालखीची मान्यवरांच्या हस्ते आरती करून मोठ्या उत्साहात वाजता गाजत फटाक्यांची आतिषबाजी करून पालखीची व महादेवाच्या मानाच्या काठ्यांची जंगी मिरवणूक काढण्यात आली. सलग पाच दिवस चालणाऱ्या यात्रा महोत्सवात सांस्कृतिक, क्रिडा, भारुड, कुस्ती यासह विविध भरगच्च कार्यक्रमाचे आयोजन करण्यात आले आहे.
या यात्रा महोत्सवाची सुरुवात शोभायात्रेने झाली. यावेळी हरिहर भजनी मंडळाचे वारकरी टाळ, मृदुंग, हर हर महादेवच्या घोषणा देत पालखी व महादेवाच्या मानाच्या काठ्यांची जगदंबा मंदीर, डॉ. बाबासाहेब आंबेडकर चौक मार्गे मिरवणूक काढण्यात आली. यावेळी पालखी व महादेवाच्या काठ्यांचे व शोभायात्रेचे छत्रपती शिवाजी महाराज चौकात आगमन होताच फटाक्यांची आतिषबाजी करून या शोभायात्रेचे मान्यवर व ग्रामस्थांच्या हस्ते महादेवाची आरती करण्यात आली. यावर्षी या शोभायात्रेत आदिवासी नृत्य करणारे पथक आकर्षण ठरले. त्यानंतर ही शोभायात्रा जुन्या गावातील प्राचीन महादेव मंदिरापर्यंत काढण्यात आली. दुपारी २ वाजता भारुडाचा जंगी कार्यक्रम संपन्न झाला. यावेळी लोहारा येथील चालक व मालक संघटनेच्या वतीने उपस्थित भाविकांना फराळ व महाप्रसादाचे वाटप करण्यात आले. महादेव मंदिर येथे सायंकाळी ७ वाजता दिपोत्सव (खास महिलांसाठी ) कार्यक्रम संपन्न झाला.
यावेळी शहरातील युवक, यात्रा कमिटीचे पदाधिकारी, कार्यकर्ते, लहान मुले यांच्यासह ग्रामस्थ मोठ्या संख्येने उपस्थित होते. यात्रेनिमित्त महादेव मंदिरावर आकर्षक विद्युत रोषणाई करण्यात आली आहे. महाशिवरात्री निमित्त बुधवारी पहाटेपासूनच महादेव मंदिरात भाविकांनी महादेवाच्या दर्शनासाठी गर्दी केली होती. गुरुवारी सकाळी दहा वाजता संजय महाराज वेळापुरे यांचे कीर्तन तर सायंकाळी चार वाजता जंगी कुस्त्यांचा फड रंगणार आहे.
