निम्न तेरणा (Terna) उपसा सिंचन योजनेसाठी आवश्यक निधीला तात्काळ मंजुरी द्यावी या मागणीसाठी महाराष्ट्र राज्याचे उपमुख्यमंत्री तथा अर्थमंत्री अजितदादा पवार (ajit pawar) यांची विधानभवन मुंबई (mumbai) येथे भेट घेतली. यावेळी अर्थमंत्र्यांनी संघर्ष समिती सदस्यांना बैठकीत तातडीने कार्यवाही करण्याचे आश्वासन दिल्याचे संघर्ष समितीच्या सदस्यांनी सांगितले.
गोदावरी पाटबंधारे महामंडळाअंतर्गत लोहारा (lohara) तालुक्यातील माकणी येथील २३ गावांना लाभ देणाऱ्या या योजनेचा प्रस्ताव तयार असून या गावातील शेतकऱ्यांनी एकमुखी मागणी केली आहे. धाराशिव तालुक्याला संजीवनी ठरणारी ही योजना गेली अनेक वर्षापासून बंद आहे. यामुळे या भागात कायम दुष्काळसदृश्य परिस्थिती निर्माण झाली आहे. संबंधित बाबी लक्षात आणून दिल्यानंतर त्यांनी या विशेष दुरुस्तीला प्राधान्य देण्याचे आश्वासन दिले असल्याचे संघर्ष समिती सदस्यांनी सांगितले. यावेळी जगदीश पाटील, अण्णासाहेब क्षीरसागर, अरुण कोळगे, दीपक सूर्यवंशी, किशोर पाटील, अमर माने, सचिन सूर्यवंशी यांच्यासह संघर्ष समितीचे सदस्य उपस्थित होते.
