लोहारा (lohara) तालुक्यातील हिप्परगा (रवा) येथे स्वराज्य संघटनेच्या वतीने जलसमाधी आंदोलन करण्यात आले.
तालुक्यातील हिप्परगा (रवा) येथील साठवण तलावात सिमेंश गमेसा व टोरंट या पवनचक्की कंपनीने साठवण तलावाच्या सांडव्यात व इतर ठिकाणी अतिउच्च दाबाचे पोल रवल्यामुळे जीवित हानी होण्याची शक्यता नाकारता येत नाही. याबाबत हिप्परगा (रवा) येथील शेतकऱ्यांनी उपविभागीय पाटबंधारे विभाग शाखा क्रमांक आठ यांना वेळोवेळी निवेदने, तक्रारी अर्ज देऊन देखील पाटबंधारे विभागाने देखील दखल न घेतल्यामुळे स्वराज्य संघटनेच्या माध्यमातून निवेदन देऊन बुधवारी (दि.१५) हिप्परगा येथील साठवण तलावात जलसमाधी आंदोलन करण्यात आले. यावेळी स्वराज्य संघटनेचे जिल्हा कार्यकारिणी सदस्य महेश गोरे, गंगाराम भोंडवे, ओमकार चौगुले, बालाजी मुळे, शिवाजी पवार, नितीन मुळे राजाभाऊ मुळे, तानाजी जाधव, तुषार जाधव आदी उपस्थित होते.
साठवण तलावातील पोल धोकादायक असल्यामुळे ते दुसरीकडून घेऊन जावेत, पवनचक्कीच्या पोलमुळे वन्य जीवा ना देखील धोका असल्यामुळे तात्काळ स्वरूपामध्ये पोल काढून टाकण्यात यावेत या मागणीसाठी स्वराज्य संघटना व शेतकरी सातत्याने पाठपुरावा करत असताना देखील प्रशासन व पवनचक्की कंपनी दखल घेत नसल्यामुळे हे जलसमाधी आंदोलन स्वराज्य संघटनेच्या वतीने करण्यात आले अशी माहिती महेश गोरे यांनी यावेळी दिली.
