प्रतिक्षा संपली : आज जाहीर होणार बारा गावचे कारभारी – थोड्याच वेळात मतमोजणीला होणार सुरुवात

वार्तादूत – डिजिटल न्युज नेटवर्क
लोहारा तालुक्यातील १२ ग्रामपंचायत निवडणुकीची मतमोजणी आज सकाळी आठ वाजता लोहारा तहसिल कार्यालयात होणार आहे. त्यामुळे या बारा गावचे कारभारी जाहीर होण्यासाठी काही काळ शिल्लक आहे. या निकालाकडे सर्व उमेदवार व गाव कारभाऱ्यांचे लक्ष लागले आहे.
लोहारा तालुक्यातील १३ ग्रामपंचायत निवडणुकीचा कार्यक्रम जाहीर झाला होता. परंतु वडगाव गांजा ग्रामपंचायत बिनविरोध निघाली. त्यामुळे तालुक्यातील सास्तुर, जेवळी (उ), माकणी, नागुर, विलासपुर पांढरी, माळेगाव, उंडरगाव, तोरंबा, सालेगाव, हिप्परगा रवा, वडगाववाडी, अचलेर या १२ ग्रामपंचायतीसाठी रविवारी (दि. १८ ) मतदान घेण्यात आले. या १२ ग्रामपंचायती मधील ३५७४८ पैकी एकूण २५४४५ मतदारांनी मतदानाचा हक्क बजावला. सकाळी ७.३० ते सायंकाळी ५.३० या वेळेत मतदान पार पडले. काही ठिकाणी किरकोळ वाद वगळता सर्व ४७ मतदान केंद्रावर शांततेत मतदान पार पडले. या बारा ग्रामपंचायतीच्या निवडणुकीतील सर्व उमेदवारांचे भवितव्य मतदान यंत्रात बंद झाले आहेत. मंगळवारी (दि. २०) सकाळी आठ वाजता लोहारा तहसिल कार्यालयात मतमोजणी करून निकाल जाहीर करण्यात येणार आहे. आठ टेबलवर ही मतमोजणी होणार असून मतमोजणीच्या आठ फेऱ्या होणार आहेत. या मतमोजणी करिता एकूण ६८ कर्मचारी नियुक्त करण्यात आले आहेत. निकाल काय लागणार याकडे सर्व उमेदवार व गावपुढाऱ्यांचे लक्ष लागले आहे.