वार्तादूत – डिजिटल न्युज नेटवर्क
मागील अनेक वर्षांपासून दुरावस्थेत असलेल्या व उमरगा शहरातील नागरिकांची मागणी असलेल्या शिवपुरी रोड व त्रिकोळी रोड या रस्त्यांच्या कामांसाठी महाराष्ट्र शासनाच्या नगरविकास विभागाकडून १० कोटी रुपयांचा निधी मंजूर करून घेतला आहे अशी माहिती आमदार ज्ञानराज चौगुले यांनी दिली आहे. यात राष्ट्रीय महामार्ग महावीर मेडिकल ते शिवपुरी कॉलनीकडे जाणारा (शिवपुरी रोड) रस्ता व गटार करणे – ७ कोटी रु. व राष्ट्रीय महामार्ग ते चिंचोळे मंगल कार्यालयाकडे जाणारा रस्ता व गटार करणे – ३ कोटी रु. याप्रमाणे निधी मंजूर झाला आहे.
उमरगा शहरात नगरविकास विभागामार्फत सध्या अनेक रस्त्यांच्या कामांना निधी मंजूर झाला असून ती कामे सुरू आहेत. परंतु शहरातील अत्यंत वर्दळीचे असलेले व शहरालगतच्या ग्रामीण भागाला जोडणारे शिवपुरी व त्रिकोळी रोडची अत्यंत दुरवस्था झाल्याने नागरिकांना खूप हाल सोसावे लागत होते. आणि सदरील दोन्ही रस्ते जिल्हा परिषदेच्या अखत्यारीत असल्यामुळे या रस्त्यांसाठी निधी मंजूर होत नव्हता व नागरिकांची मोठी गैरसोय होत होती. या भागातील नागरिक यासाठी सातत्याने माझ्याकडे निवेदनाद्वारे मागणी करत होते. यानुसार सदरील दोन्ही रस्ते जिल्हा परिषदेकडून उमरगा नगर पालिकेच्या अखत्यारित आणण्यासाठी पाठपुरावा चालू असून ही प्रक्रिया जवळपास अंतिम टप्प्यात आहे. या अनुषंगाने सदरील रस्ते न.प. कडे वर्ग होण्यापूर्वीच आपण मुख्यमंत्री एकनाथ शिंदे यांच्याकडे पाठपुरावा करून यासाठी 10 कोटी रुपयांचा निधी मंजूर करून घेतला आहे अशी माहिती आमदार ज्ञानराज चौगुले यांनी दिली आहे.
