वार्तादूत – डिजिटल न्युज नेटवर्क
शिवसेना, युवासेना व महिला आघाडीच्या वतीने दि. १२ ते १३ सप्टेंबर या कालावधीत गौरी महालक्ष्मी सजावट स्पर्धेचे आयोजन करण्यात आले होते. या स्पर्धेचे बक्षिस वितरण शनिवारी (दि. २५) दुपारी एक वाजता लोहारा येथील भानुदासराव चव्हाण महाविद्यालयात करण्यात येणार आहे.
या कार्यक्रमाच्या अध्यक्षस्थानी शिवसेना महिला आघाडीच्या जिल्हाप्रमुख शामल वडणे राहणार आहेत. तसेच स्पर्धेतील विजेत्यांना आकांक्षा ज्ञानराज चौगुले यांच्या हस्ते करण्यात येणार आहे. शिवसेना, युवासेना व महिला आघाडीच्या वतीने गौरी महालक्ष्मी सजावट स्पर्धेचे आयोजन करण्यात आले होते. ही स्पर्धा लोहारा शहराकरिताच होती. या स्पर्धेत सहभागी होऊन सजावटीचे फोटो व व्हिडिओ दि. १२ ते १३ सप्टेंबर या कालावधीत पाठवायचे होते. स्पर्धेच्या कालावधीत प्राप्त झालेल्या व्हिडिओ व फोटोमधून आकर्षक सजावटीची निवड करून विजेत्यांची निवड करण्यात येणार होती. या स्पर्धेतील प्रथम विजेत्यास पैठणी, द्वितीय विजेत्यास सोन्याची नथ तर तृतीय विजेत्यास चांदीचे नाणे बक्षिस म्हणून दिले जाणार असल्याचे व स्पर्धेतील सहभागीना सहभाग प्रमाणपत्र व भेटवस्तू दिल्या जाणार असल्याची माहिती स्पर्धेच्या आयोजकांनी दिली आहे. या कार्यक्रमासाठी सर्व स्पर्धकांनी व लोहारा शहरातील महिलांनी उपस्थित रहावे असे आवाहन लोहारा नगरपंचायतच्या प्रथम नगराध्यक्षा पौर्णिमा जगदीश लांडगे, शिवसेना महिला आघाडीच्या तालुकाप्रमुख सारिका प्रमोद बंगले, नगरपंचायतच्या माजी नगरसेविका कमलबाई राम भरारे, महिला आघाडीच्या शहर संघटक सुवर्णा विजय फावडे यांनी केले आहे.
