छत्रपती शिवाजी महाराज जयंती निमित्त तालुक्यातील तावशीगड येथे बुधवारी (दि.१९) प्रसिद्ध वक्ते प्रा. अर्जुन जाधव यांचे व्याख्यान होणार आहे.
तालुक्यातील तावशीगड येथील शिवप्रेमी मित्र मंडळ यांनी श्री छत्रपती शिवाजी महाराज यांच्या जयंती उत्सवाचे औचित्य साधून प्रेरणादायी व्याख्यानाचे आयोजन केले आहे. प्रसिद्ध वक्ते प्रा. अर्जुन जाधव हे छत्रपती शिवाजी महाराजांचे चरित्र, त्यांच्या स्वराज्य स्थापनेमागील दूरदृष्टी, नेतृत्वगुण व आधुनिक काळातील त्यांच्या विचारांची उपयुक्तता यावर प्रकाश टाकणार आहेत. यावेळी सामाजिक कार्यकर्ते धर्मवीर कदम, लोहारा पोलीस स्टेशनचे पोलीस उपनिरीक्षक सचिन केंद्रे, सरपंच महेश घोटाळे, ग्राम पंचायत अधिकारी संतोष भुसे यांची प्रमुख उपस्थिती राहणार आहे. या व्याख्यान कार्यक्रमासाठी जास्तीत जास्त संख्येने उपस्थित राहावे असे आवाहन आयोजकांनी केले आहे
