लोहारा येथील प्रतीक शेषेराव पाटील यांनी डॉ. बाबासाहेब आंबेडकर मराठवाडा विद्यापीठ, छत्रपती संभाजीनगर येथून भौतिकशास्त्र विषयात पीएच.डी. पदवी प्राप्त करून शैक्षणिक क्षेत्रात उल्लेखनीय यश संपादन केले आहे.
त्यांनी हायड्रोजन निर्मितीसाठी अत्यंत कार्यक्षम फेराइट नॅनो-कॅटलिस्टची निर्मिती व वैशिष्ट्यांचे विश्लेषण
या विषयावर संशोधन प्रबंध सादर केला. हा प्रबंध विद्यापीठाने मान्य करून त्यांना पीएच.डी. पदवीस पात्र घोषित करण्यात आले आहे. हा संशोधन प्रबंध निवृत्त प्रा. (डॉ.) के. एम. जाधव, भौतिकशास्त्र विभाग, डॉ. बाबासाहेब आंबेडकर मराठवाडा विद्यापीठ यांच्या मार्गदर्शनाखाली पूर्ण करण्यात आला. १२ जानेवारी रोजी त्यांची पीएच.डी. व्हायवा-वोसे परीक्षा यशस्वीरीत्या पार पडली. संशोधन कार्यादरम्यान प्रतीक पाटील यांचे जागतिक दर्जाच्या आंतरराष्ट्रीय जर्नल्समध्ये १५ संशोधन पेपर प्रकाशित झाले असून, त्यांच्या संशोधन कार्याची देश-विदेशात दखल घेतली जात आहे. प्रतीक पाटील यांच्या या शैक्षणिक यशाबद्दल कुटुंबीय, नातेवाईक, शिक्षक, मित्र, सहकारी तसेच विविध शैक्षणिक व सामाजिक स्तरातून अभिनंदनाचा वर्षाव होत आहे.
