हिप्परगा (रवा) येथे श्री नृसिंह यात्रा महोत्सव; विविध धार्मिक व सांस्कृतिक कार्यक्रमाचे आयोजन

लोहारा तालुक्यातील हिप्परगा (रवा) येथेगुढीपाडव्या निमित्त दरवर्षी श्री नृसिंह यात्रा महोत्सव आयोजित करण्यात येतो. यावर्षीही हा यात्रा महोत्सव आयोजित करण्यात आला असून यात विविध धार्मिक व सांस्कृतिक कार्यक्रम होणार आहेत. तसेच श्री नृसिंह केसरी कुस्ती स्पर्धेचे आयोजन करण्यात आले आहे.
या यात्रा महोत्सवात दि. १८ मार्च रोजी रात्री नऊ ते ११ या वेळेत हभप पुरुषोत्तम पाटील महाराज यांचे कीर्तन होणार आहे. दि. १९ मार्च रोजी दुपारी श्रींचे भव्य मिरवणूक होणार आहे. रात्री दहा वाजता शिवकरवाडी येथून श्रीच्या घोड्याची वाजत गाजत हिप्परगा (रवा) येथे मिरवणूक येते. त्यानंतर गौतमी पाटील यांचा डीजे शो होणार आहे. दि. २० मार्च रोजी महाप्रसादाचे वाटप करण्यात येणार आहे. रात्री श्री चा छबिना व शोभेच्या दारूची भव्य आतिषबाजी होणार आहे. त्यानंतर दि.२१ मार्च रोजी श्री नृसिंह केसरी २०२६ कुस्ती स्पर्धा होणार आहे. रात्री नऊ वाजता लावणी महोत्सव आयोजित करण्यात आले आहे. या लावणी स्पर्धेचे पहिले बक्षीस एक लाख रुपये व दुसरे बक्षीस ५१ हजार रुपये व तिसरे बक्षीस एकतीस हजार असे आहे. हिप्परगा (रवा) ग्रामस्थांच्या वतीने या यात्रा महोत्सवाचे आयोजन करण्यात आले आहे. या सर्व कार्यक्रमांचा लाभ घ्यावा असे आवाहन ग्रामस्थांनी केले आहे.