रुढी परंपरा मोडीत काढून एकल महिलांना सन्मानाने वागणूक दिली जावी. पण समाजामध्ये असं न घडता महिलेचा पती वारल्यानंतर लगेच त्या महिलेचे कुंकू पुसले जाते व बांगड्या फोडल्या जातात. याबाबत कुठेतरी समाजात जनजागृती करून ज्या एकल महिला आहेत त्यांनाही सर्वसामान्य महिलासारखं सन्मानाने जगता आले पाहिजे, त्यासाठी त्यांना सन्मान द्या असे आवाहन विजय जाधव यांनी केले.
लोहारा येथे शासकीय योजनांची माहिती देण्यासाठी आयोजित करण्यात आलेल्या मेळाव्यात उपस्थित महिलांना मार्गदर्शन करताना विजय जाधव बोलत होते. या कार्यक्रमासाठी नगराध्यक्षा वैशाली खराडे, शिवसेना (युबीटी) तालुकाप्रमुख अमोल बिराजदार, वंदना भगत, साऊ समितीचे तालुकाध्यक्ष काशिनाथ पाटील, विठ्ठल चिकुंद्रे, ज्योती राजपूत, गौरी पंडित, लता काळदाते यांची प्रमुख उपस्थिती होती. यावेळी पुढे बोलताना जाधव म्हणाले की, महिलेचे अलंकार असलेले कुंकू लावून एकल महिलांना सर्वच कार्यक्रमात सन्मान दिला जावा.
त्याचबरोबर कौटुंबिक वाद व पती-पत्नी वाद विवाद होत असतात. अशातूनच कोर्ट कचेऱ्या होतात. त्यामुळे असे वाद विवाद न करता सामांज्यसाने सोडवले पाहिजे. असे वाद साऊ समिती सामंजस्याने सोडवत आहे असे प्रतिपादन समितीचे जिल्हा समन्वयक विजय जाधव यांनी केले.
या कार्यक्रमाची सुरुवात एकल महिलांच्या हस्ते प्रतिमेचे पूजन करून करण्यात आले. या मेळाव्यात विजय जाधव यांनी बालसंगोपन योजना, संजय गांधी निराधार योजना, इंदिरा गांधी राष्ट्रीय वृद्धापकाळ योजना व तसेच दिव्यांग व इतर योजनेची सविस्तर माहिती देण्यात आली.
या मेळाव्याला लोहारा येथील अनेक एकल महिला उपस्थित होत्या.
